ଏକା-ଏକା -ଡକ୍ଟର କୃତ୍ତିବାସ ନାୟକ

ଏକା ସିନା ବୋକା ମିଶିଲେ ସାହସ ଏକା ସଦା ଅସହାୟ,

ଏକା ବସିଥିଲେ ଚିନ୍ତାଘାରେ ସିନା ମିଶିଲେ ବିତେ ସମୟ |

ଏକା ଖାଇ ଜଣେ ସୁଖ ପାଇପାରେ ଆନନ୍ଦ ପାଇବ ନାହିଁ,

ମିଳିତ ଭାବରେ ଖାଇଲେ ସୁସ୍ଵାଦ ଆନନ୍ଦ ପାଇବ ସେହି |

ଏକାଥିଲେ ନିଜ ସ୍ମୃତିକୁ ସୁମରି ହସିହେବ ମନେମନେ,

ପାଶେଥିଲେ କେହି ଖୋଲାମନ ନେଇ ହସି ପାରୁଥିବା ଆମେ |

ଏକା ଚାଲୁଥିଲେ ଥକ୍କାଲାଗେ ପୁଣି ବାଟଲାଗେ ବହୁଦୂର,

ସାଥୀ ଜଣେଥିଲେ ଦୂରପଥ ଯାତ୍ରା ହୋଇବ ସହଜତର |

ଏକା ଖେଳୁଥିଲେ ପ୍ରତିଯୋଗୀ ଭାବ ଜାଗ୍ରତ ହୋଇବ ନାହିଁ,

ମିଶି ଖେଳୁଥିଲେ ଜିତିବା ଆଶାରେ ମନହେବ ହାଇଁପାଇଁ |

ଏକା ଏକା କେହି ମଜା ପାଇଥିଲେ ସବୁ ଭୁଲି ହୋଇଯାଏ,

ସାଙ୍ଗ-ସାଥୀ ମିଶି ମଜା କରିଥିଲେ ସ୍ମୃତି ହୋଇ ରହିଯାଏ |

ଏକା ବଡ଼ କାମ କରିହୁଏ ନାହିଁ ସହଯୋଗୀ ହୁଏ ଲୋଡ଼ା,

ଏକା ଏକା ଜୀଇଁ ରହିବା ବିପଦ ଏକା ଏକା ଯାଏ ମଡ଼ା |