ମୁଁ ଶିକ୍ଷକ

ଏପାଖେ ଜୀବନ ସେ ପାଖେ ଜଞ୍ଜାଳ

ଚେତନାର ଅନ୍ତଃ ସ୍ୱର

ସୌଭାଗ୍ୟ ସୋପାନେ ବାରବାର ଯାତ୍ରା

କରିବି କି ଆବିଷ୍କାର l

ବୃତ୍ତି ପ୍ରବୃତ୍ତିର ଯୁଗଳ ବନ୍ଦୀରେ

ନିଃଶ୍ବ ମୁଁ ନିର୍ଯ୍ୟାତିତ

ଆତ୍ମା ପରମାତ୍ମା ମହା ଜାଗତିକ

ମିଳନରେ ଅଭିପ୍ରେତ l

ଶିକ୍ଷାଦାନ ମୋର ସ୍ବର୍ଗୀୟ ପେଷା

ନିଶା ମୋର ସଂରଚନା

କେମିତି କେଜାଣି ଦୁଇ ନାବେ ରହି

କରିବି କି ଆରାଧନା l

କେବେ ମନ ମୋର ବନ୍ଧା ପଡ଼ିଯାଏ

ଅନ୍ତରାତ୍ମା ସ୍ଵାକ୍ଷରରେ

ନିଶା ମୋର ଦର୍ପେ ଉଜ୍ଜୀବିତ ହୁଏ

ଭବ୍ୟ ସୃଷ୍ଟି କଳେବରେ l

କେବେ ପୁଣି ପ୍ରାଣ ପରାଜିତ ହୁଏ

ଜୀବିକାର ଦଂଶନରେ

ପେଷା ମୋର କାଳେ ବଦଳି ଯାଇଛି

ଅମଲା ତାନ୍ତ୍ରିକ ସ୍ଵରେ l

ଶାସନ କଳର ଘୃଣ୍ୟ ନିତୀ ତଳେ

ଆସ୍ପର୍ଦ୍ଧା ମୋ ଅସ୍ତମିତ

ତଥାପି ଏ ମନ ସଂଭ୍ରମରେ ହୁଏ

ସ୍ୱାଭିମାନ ଜର୍ଜରିତ l

ମୁକୁଟ ମଣ୍ଡିତ ସମ୍ରାଟ ମୁଁ ଆଜି

କ୍ଷୁଦ୍ର ମୋ ଶିକ୍ଷାୟତନେ

ଶିକ୍ଷକ ଅଳପ ଅମଲା ମୁଁ ବେଶି

ବସି ଅଛି ସିଂହାସନେ l

ପରିଚାଳନାର ଦଣ୍ଡଟିଏ ଧରି

ଫାଇଲି ଚଷୁଛି ଆଜି

ମଧ୍ୟାହ୍ନ ଭୋଜନ, ପୋଷାକ ବଣ୍ଟନ

ଭଳି ଭଳି କାର୍ଯ୍ୟଏ ମଜ୍ଜି l

ସରସ ସୁନ୍ଦର ବିଦ୍ୟାଳୟ ମୋର

ରୂପରେ ଯାଇଛି ବଳି

ଛାତ୍ର ଛାତ୍ରୀ ମୋର ପାଠ ପଢ଼ା ବିନା

ଦୁଃଖରେ ହୁଅନ୍ତି ଭାଳି l

ଏମିତି ଜୀବନେ ଅବଶୋଷ ମୋର

ବଢିଚାଲେ ନିତି ନିତି

ଶିକ୍ଷକ ଅଭାବ ଶିକ୍ଷାଦାନ ପାଇଁ

କ୍ଷତିଗ୍ରସ୍ତ ଶିକ୍ଷାନିତୀ l