ଏ ଜୀବନ କିଛି ମିଛ କିଛି ସତ

ଏ ଜୀବନ ବନ୍ଧୁ ଦିପଦ ଗୀତ 

କିଛି ମିଛ କିଛି ସତ 

ମିଛ ଅହଂକାର, ଆତ୍ମବଡ଼ିମା 

ଏ ସବୁ ମନରୁ ଜାତ l

ଯାହା କିଛି ଏଇ ମିଳିଛି ଜୀବନେ

ସେ ସବୁ ବିଧି ପ୍ରଦତ୍ତ 

ନିଜ ଭାଗ୍ୟ ଆଉ କର୍ମ ପ୍ରତିଦାନେ 

ଜୀବନେ ହୋଇଛି ପ୍ରାପ୍ତ l

ସେ ପ୍ରାପ୍ତିରେ ବନ୍ଧୁ ହୁଅ ନାହିଁ ଅନ୍ଧ 

ହୁଅ ନାହିଁ ଭାରାକ୍ରାନ୍ତ 

ଖୁସି ଆନନ୍ଦରେ ସ୍ଥିର ବିଜ୍ଞତାରେ 

ଜୀବନକୁ କର ଶାନ୍ତ l

ଦିନ ଦୁଇଟାର କଥା ଏ ଜୀବନ 

ଆଜି ଅଛି କାଲି ନାହିଁ 

ମିଛ କ୍ଷମତାର ଅନ୍ଧ ଗଳିରେ 

ନିଜକୁ ହଜାଅ କାହିଁ ।

ବୟସ ବଢିଲେ ମିଛ କ୍ଷମତାର 

ଆୟୁଷ ବି ଯିବ ସରି 

ବାର୍ଦ୍ଧକ୍ୟର ବାଧା ଖୋଜିବ ମସୁଧା 

ବିଷାଦରେ ଯିବ ଭରି l

ଖରା ରୁ ଉତ୍ପନ୍ନ ବୃଷ୍ଟି ର ପ୍ରାବଲ୍ୟ 

ବୃଷ୍ଟି ରୁ ଉତ୍ପନ୍ନ ଶୀତ 

ସେହିପରି ବନ୍ଧୁ ଜନ୍ମ ମୃତ୍ୟୁ ଚକ୍ରେ 

ଏ ଜୀବନ ଆତଯାତ l

ନିଜର କର୍ତ୍ତବ୍ୟ ମାନବିକତାକୁ 

ଜୀବନରେ କର ଶ୍ରେୟ 

କୋଟି ହୃଦୟରେ ସ୍ମୃତି ହୋଇ ରହୁ 

ଜୀବନର ପରିଚୟ l