ଏ ଜୀବନ ଦିପଦ ଗୀତ
ଏ ଜୀବନ ଦିପଦ ଗୀତ
ଏ ଜୀବନ ଦିପଦ ଗୀତ
କେବେ ସୁଖର ସାଥି ତ
ପୁଣି କେବେ ଦୁଃଖର ମିତ
ଝଡ଼ ଝଞ୍ଜାର ଚୌହଦୀ ଭିତରେ
ମାଡି ମକଚି ହୋଇ
ଏଠି ଚାଲିବାକୁ ହୁଏ ଏଇ ସଂସାର ପଥ l
ସଞ୍ଜ ଆସେ ଅବେଳରେ
ଚାହୁଁ ଚାହୁଁ ଦିନ ସରେ
ରାତି ଅଳପକୁ ଏଠି ସ୍ବପ୍ନ ବହୁତ l
ଆଶା ଏଠି ଅସୁମାରୀ
ଯାଏ ସବୁ ମରି ମରି
ଚାହୁଁ ଚାହୁଁ ମାଡିଆସେ ସମୟର ଝଡ଼
ସ୍ବପ୍ନ ସବୁ ବାଟ ଭୁଲି
ଯେ ଯାହା ବାଟେ ଯାନ୍ତି ଚାଲି
ଭାଙ୍ଗି ଯାଏ ଜୀବନର ଭରସାର ନୀଡ଼ l
ବିଶ୍ୱାସଟା ବେଳେ ବେଳେ
ଲୁଚି ଲୁଚକାଳି ଖେଳେ
ସମ୍ପର୍କ ମୋହରେ ପଡି ହୋଇଯାଏ ଅନ୍ଧ
ଅବିଶ୍ୱାସ ଢେଉ କାହୁଁ
ମାଡିଆସେ ଚାହୁଁ ଚାହୁଁ
ଧୋକା ଦେଇ ଭାଙ୍ଗିଦିଏ ଭରସାର ବନ୍ଧ l
ନିଜ ଦୁଃଖ ନିଜଠାରେ
ରହିଯାଏ ଉହାଡରେ
ଅନ୍ତରର ଯେତେ ସବୁ ଅକୁହା ବେଦନା
ଲୁହ ସବୁ କୋହ ହୋଇ
ରହିଯାଏ ଚାପି ହୋଇ
ବାଧ୍ୟ ଏଠି ହସିବାକୁ, କାନ୍ଦିବାକୁ ମନା l
ସୁଖ, ଦୁଃଖ, ଭଲ, ମନ୍ଦ
କେତେଯେ କପଟ, ଛନ୍ଦ
ଏ ଜୀବନ ଚଲାପଥେ ଘଟି ଚାଲେ ନିତି
ରାମ ନାମ ସତ୍ୟ ହେ
ହରି ନାମ ସତ୍ୟ ହେ
ଦିପଦ ଗୀତରେ ସବୁ ହୋଇଯାଏ ଇତି l