ଏ ଜୀବନ ଚଲାବାଟେ
ଏ ଜୀବନ ଚଲାବାଟେ
ଏ ଜୀବନ ଚଲାବାଟେ
କେତେଯେ ଘଟଣା ଘଟେ
କିଛି ରୁହେ ମନେ କିଛି ଯାଏ ଲୁଚି
କିଛି କଥା ପୁଣି ମନ କାଗଜରେ
ତଥାପି ତ ଥାଏ ବଞ୍ଚି l
ଅତୀତ ପଡଇ ମନେ
ନୀରବ ନିର୍ଜନେ
କିଛି ଦିଏ ଖୁସି କିଛି ଦିଏ ଦୁଃଖ
ସ୍ମୃତି ମାନସରେ କେବେ ହସଟିଏ ଚାଲି ଆସେ
ପୁଲକରେ ଯାଏ ଭରି ମୁଖ l
ଭାବନାରେ ଆସେ ଫେରି
ଅନୁତାପେ ଯାଏ ଭରି
ବିଗତ ଦିନର ଯେତେ ସବୁ ତ୍ରୁଟି
ଇଚ୍ଛା ହୁଏ ଲୋଡିବାକୁ କ୍ଷମା ଥରେ ମାଗିବାକୁ
ସମୟ ସୁଅରେ ସବୁ ଯାହା ଥିଲା ଘଟି l
ଯେତେ ମାନ ଅଭିମାନ
ଆତ୍ମଗ୍ଳାନି ଆତ୍ମଜ୍ଞାନ
ବେଳେବେଳେ ଜୀବନରେ ଆଣେ ପ୍ରଶ୍ନବାଚୀ
ବଞ୍ଚିବାର ଆତ୍ମଚେଷ୍ଟା ସଂଘର୍ଷର ପରାକାଷ୍ଠା
ଭରିଦିଏ ଅଭିଜ୍ଞତା ଜୀବନରେ କିଛି l
ହସ ଲୁହ ଭରା ଏଇ
ଏ ଜୀବନ ଚଲାଭୂଇଁ
କେବେ ଖୁସି କେବେ ପୁଣି ଦୁଃଖର ଜ୍ବଳନ
ପରିସ୍ଥିତି ଉହାଡରେ ସମୟର ତାଡ଼ନାରେ
ସବୁ ଆଶା ଅଭିଳାଷ ପଡଇ ମଳିନ l
ଧୈର୍ଯ୍ୟ କେବେ ସୌର୍ଯ୍ୟ ହୋଇ
ସଫଳତା ଆଣେ ବହି
ବଦଳାଏ ଜୀବନର ବଞ୍ଚିବାର ଧାରା
ସ୍ଥିତପ୍ରଜ୍ଞ ଅନୁଭୂତି ଦୃଢ ଲକ୍ଷ୍ୟ ଦୃଢ ମତି
ଭରିଦିଏ ଜୀବନରେ ଖୁସିର ପସରା l
ଲକ୍ଷ୍ୟ ନେଇ ଜୀବନରେ
ଚାଲିବାକୁ ହେବ ଥରେ
ସଂଘର୍ଷମୟ ଏଇ ଜୀବନର ବାଟ
ଦୃଢ ଇଚ୍ଛା ଦୃଢ଼ ମତି ବଢ଼ାଇଲେ ଆତ୍ମଶକ୍ତି
ସଫଳତା ସଙ୍ଗେ ଦିନେ ନିଶ୍ଚେ ହେବ ଭେଟ l