ଦୀପାବଳି

ସବୁ ବର୍ଷ ଭଳି ଏହି ବର୍ଷ ପୁଣି

ଆସିଅଛି ଦୀପାବଳି

କେତେ ଆଡ଼ମ୍ବରେ ପାଳୁଥିଲେ ଆମେ

ଜାଳିଣ କେତେ ଦୀପାଳି l

ରକେଟ ସାଥିରେ ଆତସବାଜି କୁ

ଲଗେଇ ଖୁସି ମନରେ

ଦୀପାବଳି ପର୍ବ ପାଳୁ ପ୍ରତି ବର୍ଷ

ଆନନ୍ଦ ଭରି ହୃଦରେ l

କରୋନା ତାଡନା ଏହି ବର୍ଷେ ପରା

ଶତ୍ରୁ ପରି ଦାଣ୍ଡେ ଠିଆ

ନିରାଡ଼ମ୍ବର ରେ ଦିବାଲି ପାଳିବି

ହେବି ନାହିଁ ଅମାନିଆ l

ଗୋଟିଏ ଦୀପଟେ ପ୍ରଥମ ଜାଳିବି

ମୋ ଦେଶର ସୈନ୍ୟ ପାଇଁ 

ନିଜ ଖୁସି ଭୁଲି ଯିଏ ନିତି ସେଠି

କମାଣେ ଗୁଳି ଖଞ୍ଜାଇ l

ଘରେ ଘରେ ସର୍ବେ ଶାନ୍ତିରେ ପାଳନ୍ତୁ

ଦୀପାବଳି ପର୍ବ ଟିକୁ

ସେଥିପାଇଁ ବୀର ନିତି ଲଢ଼େ ସେଠି

ତୁଚ୍ଛ କରି ମରଣକୁ l

ହେ ମୋ ଦେଶର ବୀର ପୁତ୍ର ଗଣ

ଜାଳେ ତଵ ନାମେ ଦୀପ

ଶତ ଆୟୁ ପ୍ରଭୁ ଦିଅନ୍ତୁ ତୁମ୍ଭକୁ

ପ୍ରାପ୍ତ କର ବୀର ଦର୍ପ l

ଦ୍ଵିତୀୟ ଦୀପ ଟି ଜାଳିବି ମୁଁ ନିଶ୍ଚେ

କୃଷକ ଭାଇଟି ପାଇଁ

ଦିନ ରାତି ଯିଏ ବିଲରେ ଖଟିକି

ଆହାର ଯୋଗାଉ ଥାଇ l

ତାର ଦୁଃଖ କଷ୍ଟ ବାଣ୍ଟି ପାରିବିନି

ଅର୍ଣ୍ଣ ଦାତା ପରା ସିଏ

ଖରା ବର୍ଷା ଶୀତ କିଛି ବି ନ ମାନି

କର୍ମ କରି ଚାଲିଥାଏ l

ଜାଳିବିନି ଖାଲି ଏହି ଦୁଇ ଦୀପ

ଜାଳିବି ମୁହିଁ ଅନେକ

ମୋ ଦେଶର ସବୁ ଡାକ୍ତର, ପୋଲିସ

ତାଙ୍କ ପାଇଁ ଅନ୍ୟ ତକ l

ହୃଦୟ କୋଣରୁ ଅନେକ ଶୁଭେଚ୍ଛା

ଜଣାଉଅଛି ସଭିଙ୍କୁ

ଏକାଠି ନହୋଇ ଭିଡକୁ ଏଡାଇ

ଜାଳ ସବୁ ଦୀପାଳିକୁ l

ଆର୍ଥିକ ସ୍ଥିତି କୁ ଦେଇଛି ବିଗାଡି

କରୋନା ଶତ୍ରୁ ଟି ଜାଣେ

ଅତି ଦୁଃଖ କଷ୍ଟେ ଦିନ କାଟୁଛନ୍ତି

ଖାଇବାକୁ ନାହିଁ ମାଣେ l

ଅର୍ଥ ବ୍ୟୟ ମୁହିଁ କରିବିନି ଜମା

ଅଯଥାରେ କିଣି ବାଣ

ସେଇ ଅର୍ଥେ ମୁହିଁ ସାହାଯ୍ୟ କରିବି

ଗରିବ ଦୁଃଖୀଙ୍କୁ ଜାଣ l

କରୋନା ଯୋଦ୍ଧାଙ୍କ ପରିଶ୍ରମଟିକୁ

କରିବାନି ଆମେ ବୃଥା

ଘରେ ରହି ଆମେ ପରବ ପାଳିବା

ଦୀପଦାନ କରି ଯଥା l

ବିଦାୟ ଦେଉଛି ଦୀପାବଳି ତୋତେ

ଆର ବର୍ଷେ ଯାଇ ଦେଖା

କରୋନା ରୁ ମୁକ୍ତ ହେଉ ଆମ ଧରା

ପ୍ରଭୁପାଦେ ମାଗେ ଭିକ୍ଷା l