ମାଟି ମାଆ

ମାଟିରୁ ଆରମ୍ଭ ମାଟିରେ ଶେଷ

ସେ ନଥିଲେ ସର୍ବେ ହେବେ ବିନାଶ l

ଘର ତୋଳୁ ଆମେ ମାଟି ଉପରେ

ଚାଲୁ ପୁଣି ଆମେ ଏଇ ମାଟିରେ l

ମାଟି ନଥିଲେ ନଥାଆନ୍ତା ଗଛ

କି କରନ୍ତୁ କେବେ ଚିନ୍ତା କରିଛ l

ମାଟି ପାଇଁ କ୍ଷେତେ ସୁନା ଫଳେଟି

ଖାଦ୍ୟ ଖାଇ ସର୍ବେ ବଡ଼ ହେଊଟି l

ଉତ୍ପାଦନ ଶକ୍ତି ତା ପାଖେ ଅଛି

ଗଛ ଲତା ତାର ପାଇଁ ବଞ୍ଚିଛି l

ଗଛ ଅଛି ବୋଲି ନେଉ ନିଃଶ୍ୱାସ

ମାଟିର ଅଟେ ଏ କାର୍ଯ୍ୟ ବିଶେଷ l

ଚାଲୁ ବୁଲୁ ଆମେ କୋଳେ ତାହାରି

ନାଚୁ ଖେଳୁ ଆମେ ମାଟି ଉପରି l

ମାଟି ଦେଇ ବୋହି ଯାଏ ନଦୀଟି

ଜୀବଜଗତକୁ ପୁଣି ଜଳ ବାଣ୍ଟେଟି l

ଜନ୍ମ ହୋଇ ଯେବେ ଆଣ୍ଠେଇ ଥାଉ

ମାଟି ପରେ କେତେ ଧୂଳି ଯେ ହେଉ l

ପିଲାଦିନେ ରାନ୍ଧୁ ଭାତ ତିଅଣ

ମାଟିରେ ଗଢୁ ଯେ କେତେ କଅଣ l

ସଢ଼େଇରେ ଦେଇ କାଦୁଅ ମାଟି

ମିଛରେ ରାନ୍ଧିକି ଖାଇ ଥାଉଟି l

ବେଳେ ବେଳେ ପୁଣି କେତେକ ପିଲା

ଖାଉଥାନ୍ତି ମାଟି ପୁଳାକୁ ପୁଳା l

କଂହ୍ନେଇର ମାଟି ଖିଆ ବିଖ୍ୟାତ

ଜଗିଥାନ୍ତି ତେଣୁ ତାତ ଓ ମାତ l<

Advertisement

/strong>

ଖରାଦିନେ ଦାଣ୍ଡୁ ବୁଲି ଆସିଲେ

ଥଣ୍ଡା ପାଣି ଟିକେ ଦର୍କାର ହେଲେ l

ଧନୀ ଘରେ ସିନା ଫ୍ରିଜଟି ଅଛି

ଥଣ୍ଡା ପାଣି ତେଣୁ ସେହୁ ପିଉଛି l

ଗରୀବର ଆଶା ମାଠିଆ ପାଣି

ପିଇବାକୁ ହିତ ମନକୁ ଜାଣି l

ମାଟିର କଣ୍ଢେଇ କି ମନୋହର

କିଣି ନିଏ ମନ ସବୁରିଙ୍କର l

ମାଟିର କୁଡ଼ିଆ କେଡେ ସୁନ୍ଦର

ଖରାଦିନ ଲାଗେ ସରଗ ପୁର l

ବରଷାରେ ମାଟି ଓଦା ହୋଇଲେ

ଭିଜା ମାଟି ବାସ୍ନା ଚହଟେ ହେଳେ l

ଜୀବଜଗତ ରେ ଯେତେ ଜୀବଟି

ଲୋଡ଼େ ପ୍ରତିକ୍ଷଣେ ଏହି ମାଟିଟି l

ଜୀବନ ଚକ୍ରରେ ଏଇଠି ଶେଷେ

ପାର୍ଥିବ ଶରୀର ମାଟିରେ ମିଶେ l

ତାହାଠୁ ଆରମ୍ଭ ତାହାଠି ଶେଷ

ରହିଯାଏ ସ୍ମୃତି ଅଂଶ ବିଶେଷ l

କେତେ ଯେ ଆସିକି ଗଲେଣି କେତେ

ଏହି ମାଟି କୋଳେ ବଢି ସମସ୍ତେ l

ମାଟି ନୁହେଁ ସେତ ମାଆ ଆମରି

କେତେ ଅଳି ସହେ ମା'ର ପରି l

ନମସ୍କାର କରେ ପାଦେ ତାହାର

ମାଟି ନୁହେଁ ସେ ଯେ ମା ଆମର l

କରିବାନି କେବେ ଦୂଷିତ ତାକୁ

ସ୍ୱଚ୍ଛ ରଖ ତେଣୁ ମାଟି ମାଆକୁ l