ଦିବ୍ୟ ଚକ୍ଷୁ

ବିଧାତାର ଆଶୀର୍ବାଦେ 

      ଜନ୍ମୁ ନେତ୍ର ହୀନ l

ଆଲୋକ ନ ଜାଣେ ମୁହିଁ 

        କରିନି ଦର୍ଶନ ll

ଜାଣେନା ଦିବସ ରାତ୍ର 

      ଜାଣେନା ମୁଁ ସଞ୍ଜ l

ମାନସ ପଟେ ଦେଖଇ 

      ଦିବ୍ୟ ଜ୍ୟୋତିପୁଞ୍ଜ ll

ସୂରୁଯଙ୍କୁ ଅନୁଭବେ ଲାଗେ 

         ଯେବେ ତାତି l

କିନ୍ତୁ ସେ କି କରିପାରେ 

        ଦିନ ଆଉ ରାତି ? 

ମୁଁ କରେ ନିର୍ମାଣ ମୋର 

    .   ଦିବସ ରଜନୀ l

ଜାଗ୍ରତେ ଦିବସ ମୋର 

        ସୁଷୁପ୍ତି ଯାମିନୀ ll

ମୋ ପାଇଁ ସରବେ ସଦା 

         ଦୟା ବହିଥାଅ l

ନାହିଁ ମୋର ନେତ୍ର ଏକା 

        ଆଶ୍ରା ଦୟାମୟ ll

ମୁହିଁ ରାଜା ଅଟେ ମୋର 

       ତମୋମୟ ରାଜ୍ୟେ l

ବିଶ୍ୱ ସମ୍ରାଟ ମୋ ସଦା 

        ରହିଛନ୍ତି କାର୍ଯ୍ୟେ ll

ଦିବ୍ୟ ଚକ୍ଷୁ ବଳେ ଦେଖେ 

         ଏ ସାରା ଜଗତ l

ନାଚି ଖେଳି ଗାଉଛି ମୁଁ 

        ଆନନ୍ଦରେ ଗୀତ ll

ହୃଦେ ଭରି ଥାଅ ବିଭୁ 

           ହରଷ ସତତ l

ଗାଉଥାଏ ହର୍ଷେ ସଦା 

         ଜୀବନ ସଙ୍ଗୀତ ll