ଦେଶ ବନ୍ଦନା : ଜୟ ଜୟ ପୁଣ୍ୟଭୂମି -ଡକ୍ଟର କୃତ୍ତିବାସ ନାୟକ

ଜୟ ଜୟ ପୁଣ୍ୟଭୂମି ମାଆ ମୋର ଭାରତ,

ଆମେ ତୋ' ସନ୍ତାନ ପୁଣି ସେବାକାରୀ ଭକତ | (ଘୋଷା)

ତୋ' ନଦୀ-ନାଳର ଜଳ ଆମପାଇଁ ଜୀବନ,

ସଂପର୍କର ସେତୁ ବାନ୍ଧେ ଆକାଶର ପବନ |

ତୋର ବନ-ଗିରି-ଲତା ଦେଖିହୁଏ ମୋହିତ | 

ଜୟ ଜୟ ପୁଣ୍ୟଭୂମି ମାଆ ମୋର ଭାରତ,

ଆମେ ତୋ' ସନ୍ତାନ ପୁଣି ସେବାକାରୀ ଭକତ |(1)

ତୋର ହୃଦ ସ୍ପନ୍ଦନରେ ମୁହିଁ ପରା ନିଃଶ୍ଵାସ,

ତୋ' କୋଳେ ମୁଁ ସୁରକ୍ଷିତ ରହିଛି ଏ ବିଶ୍ୱାସ |

ତୋ' ସୁରକ୍ଷା ପାଇଁ ଦେଲେ ଦେବୁ ଆମେ ରକତ |

ଜୟ ଜୟ ପୂଣ୍ୟଭୂମି ମାଆ ମୋର ଭାରତ,

ଆମେ ତୋ' ସନ୍ତାନ ପୁଣି ସେବାକାରୀ ଭକତ |(2)

ତୋ' ମାଟି କାଦୁଅ ସିନା ମୋର ମଥା ଚନ୍ଦନ,

ତୋର ସୁନା ଫସଲରେ ଗଢ଼ା ମୋର ପରାଣ |

ତୋ' ତ୍ରିରଙ୍ଗା ଉଡ଼ୁଥିଲେ ଚାହିଁଥିବି ଜଗତ |

ଜୟ ଜୟ ପୂଣ୍ୟଭୂମି ମାଆ ମୋର ଭାରତ,

ଆମେ ତୋ ସନ୍ତାନ ପୁଣି ସେବାକାରୀ ଭକତ |(3)