ଦେବସ୍ନାନ
ଦେବସ୍ନାନ
ଡହ ଡହ ତାତି ପାରୁନାହିଁ ସହି
ପ୍ରଭୁ କାଳିଆ ଗୋସାଇଁ
ସ୍ନାନ କରେ ସେହି ସ୍ନାନ ମଣ୍ତପରେ
ଭାଇ ଭଉଣୀ କୁ ନେଇ ॥୧॥
ଜଗା ପଂଚତ୍ରିଶ ବଳିଆ ତେତିଶ
ସୁଭଦ୍ରା ବାଇଶି ଗରା
ପ୍ରଭୁ ସୁଦର୍ଶନ ଅଠର ଗରାରେ
ତୃପତ ହୁଅନ୍ତି ପରା ॥୨॥
ସ୍ନାନ ସାରି ପ୍ରଭୁ ଗଜ ରୂପେ ବସି
ମୋହନ୍ତି ଭକତ ମନ
କରୁଣା ସାଗର ଦୟା ଅବତାର
ସେହି କରୁଣା ନିଦାନ ॥୩॥
କୁଅ ପାଣି ନେଇ ଗାଧୋଇ ଗାଧୋଇ
ଅରଜିବ ଥଣ୍ତା ଜ୍ବର
ପ୍ରସାଦ ନଖାଏ ପନ୍ଦର ଦିନ ଲୋ
ଜଡିବୁଟି ଲାଗେ ତାର ॥୪॥
ଅଣାକାର ଅଙ୍ଗେ ଅଣସର ଘରେ
ବଇଦର ଉପଚାର
ଫୁଲୁରି ତେଲରେ ଘସି ସେବା କରେ
ବିଶ୍ବାବସୁ ବଂଶଧର॥୫॥
ପଟିଦିଅଁ ପୁଜା ଗରଭ ଗୃହରେ
ଶ୍ରୀକ୍ଷେତ୍ରେ ଦର୍ଶନ ମନା
ବ୍ରହ୍ମଗିରି ଠାରେ ଉଡେ ଫର ଫର
ଅଲାରନାଥ ଙ୍କ ବାନା ॥୬॥
ଈଶ୍ବର ହୋଇକି ମାନବୀୟ ଲୀଳା
ପ୍ରଭୁ ଜଗନ୍ନାଥ କରେ
ଭକତ ବତ୍ସଳ ଭକତ ବାନ୍ଧବ
ଭକତ ଦୁଃଖକୁ ହରେ ॥୭॥