ଦେବ ଦାସୀ
ଦେବ ଦାସୀ
ମାହାରୀ ସେବକ ମୁଁହି ହେ ତୁମର
ମୁହିଁ ଛାର ଦେବ ଦାସୀ
ଦୋଷ ମୋନ ଧର ପ୍ରେମ ରେ ଅନ୍ତର
ଭରି ଦିଅ ହସ ଖୁସି ।
ଭକ୍ତି ପୂତ ଭାବେ ସମର୍ପିତ ମୁଁହି
ପ୍ରଭୁ ହେ ତୁମ ପୟରେ
ତୁମ ସେବା ବିନା ଆନ କେଉଁ ଠାବେ
ଭାବନା ନାହିଁ ମନରେ ।
ଫୁଲ ପରି ବାସ ବିତରି ତୁମର
ହୋଇବି ଗଳାର ହାର
ହରଷ ମନରେ ତୁମରି ପ୍ରେମରେ
ଯାଉ ମୋ ଜୀବନ ଚିର ।
ଚରଣେ ପାଦୁକା କରି ଦିଅ ପ୍ରଭୁ
କରୁ ଥିବି ତୁମ ସେବା
ସୁବାସ ମହକେ ମହକାଇ ଦେବି
ଚନ୍ଦନ କର ହେ ବାବା ।
ବାସ ବିତରିବି ଭକ୍ତି ରେ ଚଳିବି
ଗାଇବି ଗୁଣ ପ୍ରତିଭା
ବାସେ ଦିଅ ଭରି ଧୂପ କାଠି କରି
କରୁ ଥିବି ତୁମ ସେବା ।
ବସି ଦୀପ ପରି ଆଲୋକିତ କରି
ନାଶିବି ମନ୍ଦିର ତମ
ମୋତେ ଦୀପ ଟିଏ କରି ଦିଅ ଆହେ
ଦୟାମୟ ପ୍ରିୟତମ l
ତୁମ ପୂଜା ଲାଗି ଲାଗି ମୁଁ ହୋଇବି
ଜୀବନେ ଲଗାଇ ବାଜି
ଜୀବନ ମୋହର ସେବାରେ ତୁମର
ସମର୍ପିତ କଲି ଆଜି ।
ସଦା ତୁମ ପ୍ରେମେ ନିମଗନ ମନେ
ବାଢ଼ଇ ଭକ୍ତି ପ୍ରଣତି
ନତ ଶିରେ ମାଗେ ତୁମ ଆଶୀର୍ବାଦ
ସେବେ ତୁମ ପଦେ ନିତି ।
ତନୁ ମନ ସବୁ ପୟରେ ଅର୍ପିଲି
ତୁମରି ପବିତ୍ର ପ୍ରେମେ
ମୋ ଜୀବନ ଚିର ହେଉ ଅଗ୍ରସର
ନାଚି ଗାଇ ତୁମ ନାମେ ।
ମନୁ ଈର୍ଷା , ଦ୍ୱେଷ , ଲୋଭ ଓ ଗରବ
ହରଣ କରିଣ ନିଅ
ଅନ୍ତର ହରଷେ ନାଚି ଗାଇ ସୁଖେ
ସେବା ରେ ଥିବି ହେ ପ୍ରିୟ ।
ପରମ ତୃପ୍ତି ରେ ଘୁଙ୍ଗୁର ର ତାଳେ
ତୁମରି ପାଇଁ ନାଚିବି
ବଞ୍ଚି ଥିବା ଯାଏଁ ତୁମରି ପ୍ରେମରେ
ନିମଗନ ରହି ଥିବି ।