ଦାଦନ

ଜୀବନରେ ବହୁ ମୂଲ୍ୟବାନ ଶ୍ରମ

କଠୋର ତ ହୋଇଥାଏ,

ମନଯୋଗ ଦେଇ ଶ୍ରମ କରିଗଲେ 

ସଫଳତା ମିଳିଥାଏ |୧|

ଦୁନିଆଁ ବୁକୁରେ ପ୍ରଭୁଙ୍କ ଆଖିରେ

ଆମେ ତ ସବୁ ଶ୍ରମିକ,

ତାହାଙ୍କ ଦୃଷ୍ଟିରେ ସମସ୍ତ ମଣିଷ

ସଫଳତାର ପାହାଚ |୨|

ଶ୍ରମିକ ନିଜକୁ ପ୍ରମାଣିତ କରେ

ଦେଇକରି ଶ୍ରମଦାନ ,

ନିଜ ଅଜାଣତେ କିନ୍ତୁ କେତେବେଳେ

ବନିଯାଏ ସେ ଦାଦନ |୩|

ପେଟ ଖଣ୍ଡ ପାଇଁ ନିଜ ପରିବାର 

କେବେ ବିକ୍ରି ହୋଇଯାଏ,

ଦାଦନ ଶ୍ରମିକ କିଛି ଟଙ୍କା ପାଇଁ 

ଆପେ ଆପେ ବନିଯାଏ |୪|

ସୁନ୍ଦର ସଂସାର ପେଟ ପୋଷିବାକୁ

ଦୂର ଦେଶ ଚାଲିଯାଏ,

ମାଲିକ ତାଡ଼ନା ପୁଣି ତା କାମନା

ନିଆଁରେ ତ ଜଳିଯାଏ |୫|

ଦିନ ରାତି ଖାଲି ଶ୍ରମ ଆଉ ଶ୍ରମ

ଖାଇବାକୁ ମିଳେନାହିଁ,

ପଇସା ମାଗିଲେ ଗୋଇଠା ମିଳଇ

ଭାଗ୍ୟଟାକୁ ନିନ୍ଦୁଥାଇ |୬|

ହାୟ ଭଗବାନ, ଦେଲ ଯେବେ ମୋତେ

ସୁନ୍ଦର ମଣିଷ ଜନମ,

କୁହ କାହିଁପାଇଁ ଖାଇବାକୁ ଗଣ୍ଡେ

କରିଦେଲ ନାହିଁ କରମ |୭|

ହାତ ଆଙ୍ଗୁଠିକୁ କାଟି ବନ୍ଧା ରଖେ 

କେବେ ପିଠିରେ ଚାବୁକ,

ପ୍ରତିବାଦ କଲେ ସ୍ତ୍ରୀର ଇଜ୍ଜତ

ଲୋଟିପଡ଼େ ସେହି ଦଣ୍ଡକ |୮|

ନରମ ହାତରେ କଲମ ଜାଗାରେ

ଧରାହୁଏ ଲୁହା ହାତୁଡ଼ି,

ନମାନିଲେ ସେହି ଦାଦନ ହାତରେ

ଧରାହୁଏ ଲମ୍ବା ଶିକୁଳି |୯|

ଘୃଣ୍ୟ ପରମ୍ପରା ସମାଜ ଦେହରୁ 

କେବେ ପୁଣି ଚାଲିଯିବ,

ଦାଦନ ମୁହଁରେ ହସର ଫୁଆରା

ପୁଣି ଲେଉଟି ଆସିବ |୧୦|