ଲାଇବ୍ରେରୀ
ପ୍ରୋଫାଇଲ୍
ଭିନ୍ନ ଦୃଷ୍ଟିକୋଣ
ଭିନ୍ନ ଦୃଷ୍ଟିକୋଣ
ଟିଭି ଦେଖୁ ଦେଖୁ ଧାଡିଏ ଶୁଭିଲା
ଜେଜେମାର ପିଲାବେଳର ତାଗିଦ ପରି ଲାଗିଲା
କହି ଦେଉଥାଇ ପରକୁ
ସବୁ ଓଲଟପାଲଟ ହେବ ହିଁ ହେବ
ନିଜ କଥା ଆସିଲା ବେଳକୁ
ଦୀପ ତଳ ଅନ୍ଧାର
ନିଜ ସ୍ୱାର୍ଥକୁ ଜାଳିଦେଲେ ହିଁ
ଆଲୋକିତ ହେବ ଘର ପରିବାର
ଭାବନ୍ତି ସମସ୍ତେ
ଶାଶୁ ଦେହ ଖରାପ ହେଲେ
ବୋହୁ ସେବା କରିଲେ
ଘର ଟା ମନ୍ଦିର ପରି ବାସିବ
ଆଉ
ବୋହୁ ଦେହ ଖରାପ ହେଲେ
ତା ବାପ ଘରକୁ ପଠେଇ ଦେଲେ
ଘର ଟା ଶାନ୍ତିରେ ନିଶ୍ୱାସ ମାରିବ
ବିଚାରନ୍ତି ସର୍ବେ
ଝିଅ କଥା ମାନିଲେ ଜ୍ୱାଇଁ ସୁନା ପୁଅ
କେତେ ପ୍ରସଂସା ଆଦର
କେତେ ବ୍ୟବସ୍ଥା ଅଭ୍ୟର୍ଥନା ଉପଚାର
ଆଉ ନିଜ ପୁଅ ବୋହୁ କଥା ମାନିଲେ
ଥରେ ଦୁଇ ଥର ହଁ ରେ ହଁ ମିଶେଇଲେ
ଜାଣ କଥା ସରିଲା
ମାଇପ ସୋଆଗିଆ ମାଇଚିଆ
ଇତ୍ୟାଦି ନୂଆ ବିଶେଷଣରେ ହେବ
ନିତି ପ୍ରଚାର ପ୍ରସାର
କହନ୍ତି ସଭିଏଁ
ପୁଅ ଚାକିରିରୁ ଫେରିଲେ ଟିଭି ଦେଖିବ
ଥକି ଯାଇଛି ବହୁତ
ଦେଶ ବିଦେଶର ଖବର ଉପରେ ରଖୁ ନଜର
ମୋବାଇଲରେ ଗପିବ ସାଙ୍ଗ ସହୋଦର
ବୋହୁ ଅଫିସରୁ ଫେରିଲେ ରୋଷେଇ ଘରେ
ପୁଣି କେଇ ଘଣ୍ଟା ଝାଳେଇବ
ନଣନ୍ଦ ଭାଉଜକୁ କହୁଥିବ
ମା'ର ସେବା ଶୁଶ୍ରୁଷା ଉପଦେଶ
ନିଜ ଘରେ ଶାଶୁ -ଶ୍ବଶୁରଙ୍କୁ ଗାଁରେ ଛାଡ଼ି
ସହରରେ ଏକା ରହୁଥିବ
ପିଲାଙ୍କ ସ୍କୁଲଛୁଟିରେ ବି ଗାଁକୁ ଯିବାକୁ
ନାକ ଟେକୁଥିବ
ଇତ୍ୟାଦି ଅନନ୍ୟ ଉଦାହରଣ ପରିବେଶ
କାହିଁକି ଏମିତି ଭିନ୍ନ ଦୃଷ୍ଟିକୋଣ
ଚିନ୍ତା ଚେତନାରେ ଏମିତି ଭାବନା ରହିଲେ
ଘର ପରିବାର ସମାଜର ହେବକି କଲ୍ୟାଣ ?
