ବାକି ଜୀବନ

ମଧୁର ଜୀବନ ମଧୁର ସପନ

ମଧୁର କାକଳିଭରା,

ମଧୁମୟ ଏହି ଅସାର ସଂସାର

ଜଞ୍ଜାଳ ଜଳଦ ଭରା |୧|

ସୁଖ ଦୁଃଖ ଦୁଇ ସଂସାରର ଫଳ

ଲାଗଇ ବଡ଼ ରସାଳ,

ସୁଖ ଫଳ ଭୁଞ୍ଜି ବାକି ଜୀବନଟା

ଲଙ୍ଘିଥାଏ ଦୁଇ କୂଳ |୨|

ଯେମିତି ଚିନ୍ତିବ ସେମିତି ମିଳିବ

ସଂସାରର ମହା ଫଳ,

ପାପ ମନ ଲଭେ ବିଷ ଫଳ ସିନା

ପୁଣ୍ୟମନ ପୁଣ୍ୟ ଫଳ |୩|

ନୁହେଁ କିଛି ଏଠି ବିଷର ଭଣ୍ଡାର

ସବୁ ଅଟଇ ଅମୃତ,

ବିଷକୁ ଅମୃତ କରି ପାରିବ ତ

ବଚନାମୃତ ସଙ୍ଗତ |୪|

ବାକି ଜୀବନକୁ ସଙ୍ଗ କରିବାକୁ

ଲୋଡ଼ା ଅମୃତ ବଚନ,

ଅମୃତ ବଚନ ଭର ପ୍ରାଣଧନ

ସୁଖରୂପି ମହାଧନ |୫|

ବାକି ଜୀବନର ଭରଣ ପୋଷଣ

ସଞ୍ଚିଥିବ ସତ୍ଯବାଣୀ,

ସତ୍ଯରେ ସଂସାର ସଂସାରରେ ସତ୍ଯ

ବହୁଥାଏ ନିତ୍ଯ ଜାଣି |୬|

ବୈକୁଣ୍ଠର ପୁର ଅମୃତର ଝର

ବହେ ଶତଧାର ହୋଇ,

ସେ ଅମୃତ ପାନ ଭରିଯାଉ ମନ

ସଂସାର ଅମୃତ କରି |୭|

ଜୀବନ ହୋଇବ ସରଳ ସାର୍ଥକ

ଅମୃତର ମହାଦାନେ,

ସରଳ ଜୀବନ ଲଭେ ମହାପୁଣ୍ୟ

ପୂର୍ଣ୍ଣ ହୁଏ ମହାପୁଣ୍ୟେ |୮|

ଯାହା ହୁଏ ପୁଣି ଚକ୍ଷୁର ଗୋଚର

ସର୍ବମୟ ନିଷ୍ଠା ସତ୍ଯ,

ସତ୍ଯରେ ଚାଲଇ ସତ୍ଯରେ ଚଳଇ

ହୋଇଯାଏ ମହାସତ୍ଯ |୯|

ବାକି ଜୀବନରେ ସତ୍ଯପଥେ ଚାଲ

ଲଭିବ ସତ୍ଯ ଆଲୋକ,

ସତ୍ଯପଥ ହେବ ଜୀବନର ପଥ

ପଛେ ଥିବେ କୋଟି ଲୋକ |୧୦|