ଚଉପଦୀ - ସଖିମେଳେ ରାଜଜେମା

କବି - ଲିଙ୍ଗରାଜ

ତାଳ - ଏକତାଳି

ସଖିମେଳେ ରାଜଜେମା

ହୋଇଛି ଠିଆ ଲୋ ।

ତରାଗଣ ମଧ୍ୟେ ଯେହ୍ନେ

ଚନ୍ଦ୍ରଉଦିଆ ଲୋ । ଘୋଷା ।

କାଟିଛି ଚୈତନ୍ୟ କଲି

ତା ପରେ ସୁନା ଟିକିଲି ।

ନାସାରେ ଲାଖିଛି ଫୁଲି

ବସଣୀ ରୁଆ ଲୋ । ୧ ।

ଓଟାରି ବାନ୍ଧିଛି ଜୁଡ଼ା

ସେବତୀ ମଲ୍ଲୀ ପାଖୁଡ଼ା ।

ତହିଁକି ହୋଇଛି ବେଢ଼ା

କେତକୀ କିଆ ଲୋ । ୨ ।

ନୟନେ ରଞ୍ଜିତ କଲା

ପାଦରେ ବାଜେଣୀ ବଳା ।

ଝୁମୁ ଝୁମୁ ଝମକୁଛି

ପାଦଝୁଣ୍ଟିଆ ଲୋ । ୩ ।

କହଇ ଲିଙ୍ଗରାଜନ

କୁମାର ପୂର୍ଣ୍ଣିମା ଜହ୍ନ ।

ତୋଠାରେ ଦେଇଛି ମନ

କର ସୁଦୟା । ୪ ।