ଚଉପଦୀ - ଚାହୁଁ ଚାହୁଁ ବୁଡ଼ିଲା

ଚାହୁଁ ଚାହୁଁ ବୁଡ଼ିଲା ମୋ ଭେଳା

କବି - ସାଲବେଗ

ହେ ଚକାଡୋଳା

ଚାହୁଁ ଚାହୁଁ ବୁଡ଼ିଲା ମୋ ଭେଳା ।

ଏକ ଚକେ ରଥ ଚାଲୁଥିଲା

ବେନି ଚକ ହେଲୁ ନ ଚଳିଲା ।

ତିଳ ଚୋପା ପ୍ରାୟେ କବାଟ ଲାଗିଛି

ତହିଁ ମତ୍ତଗଜ ଖେଳୁଥିଲା । ୧ ।

ବନ୍ଧ ନାହିଁ ପାଣି ରହିଥିଲା

ବନ୍ଧ ହେଲା ପାଣି ବହିଗଲା ।

ସେ ବନ୍ଧ କାଟନ୍ତେ ତଳକୁ ନ ଯାଇ

ଉପରକୁ ପାଣି ବହିଗଲା । ୨ ।

ବାଇଶି ପାବଚ୍ଛ ଗଳିମୁଖେ

କୈବଲ୍ୟ ରହିଛି ବେନି ପାଖେ ।

ବ୍ରାହ୍ମଣଠାରୁ ଚଣ୍ଡାଳ ପରିଯନ୍ତେ

କୈବଲ୍ୟ ଦିଅନ୍ତି ମୁଖେ ମୁଖେ । ୩ ।

କହେ ସାଲବେଗ ରସଲୀଳା

କେ କହିପାରିବ କୃଷ୍ଣଲୀଳା ।

ସହନ୍ତା ଦୀପରେ ଅନଳ ଜଳୁଛି

ତଇଳ ପକାନ୍ତେ ଲିଭିଗଲା । ୪ ।