Library
ଚଳନ୍ତି ଠାକୁର
ଚଳନ୍ତି ଠାକୁର
ଠାକୁରଙ୍କୁ କିଏ ଦେଖିବ କି ନାହିଁ
କହି କି ପାରିବ କିଏ ?
ପିତାମାତା ଆମ ଚଳନ୍ତି ଠାକୁର
ତାଙ୍କୁ ଦେଖିଛେ ସଭିଏଁ ।
ଠାକୁରଙ୍କୁ ନିତି ପୂଜା କରୁ ଆମେ
ଆମ ସୁଖ ଶାନ୍ତି ପାଇଁ।
ଭଲ ମନ୍ଦ ସବୁ ଜଣାଉ ତାହାଙ୍କୁ
ବିପଦୁଁ ଉଦ୍ଧାର ପାଇଁ ।
ସମାଜରେ ଭଲ ମଣିଷଟେ ହୋଇ
କିପରି ହୋଇବା ଠିଆ ।
ଠାକୁରଙ୍କ ପାଶେ ଗୁହାରି କରୁଛେ
ନିତି ମାରୁଛେ ମୁଣ୍ଡିଆ ।
ମାଟି କାଠ ଧାତୁ ପଥର ମୂରତି
ଭାବିଛେ ଆମେ ଠାକୁର ।
ଆଖିରେ ଦେଖୁଛେ ଦେଉଳ ଭିତରେ
ବସିଛନ୍ତି ସେ ଆମର ।
ଯେତିକି ଭକତି କରୁଛେ ତାହାଙ୍କୁ
ସେତିକି ଭକତି କଲେ ।
ଚଳନ୍ତି ଠାକୁର ପିତାମାତା ଆମ
ସନ୍ତୁଷ୍ଟ ହୋଇବେ ଭଲେ ।
ପିତା ନାରାୟଣ ମାତା ଲକ୍ଷ୍ମୀ ମୂର୍ତ୍ତି
ଏଇ ଭାବନା କରିବା ।
ପିତାମାତାଙ୍କର ପାଦ ତଳେ ଆମେ
ମନ ପ୍ରାଣ ସମର୍ପିବା ।
ଜନମ କାଳରୁ ମୃତ୍ଯୁ ପରିଯନ୍ତେ
ତାଙ୍କରି ଆଶିଷ ବାରି ।
ଝରି ପଡୁଥାଏ ଆମରି ଉପରେ
କିଏ ହେବ ତାଙ୍କ ସରି ?
ଈଶ୍ବରଙ୍କୁ କିଏ ଚାଲିବା ଦେଖିଛେ
କଥା କହିବା ଦେଖିଛେ ?
ଚଳନ୍ତି ଠାକୁର ପିତାମାତା ଆମ
ସମସ୍ତେ ତାଙ୍କୁ ଦେଖିଛେ।
ସକଳ ଅଝଟ ଅଳି ଅରଦଳି
ସବୁ ସହିଲେ ଆମର ।
ନିଜ ଦୁଃଖ କଷ୍ଟ ପଛକୁ ପକାଇ
ଆମକୁ କଲେ ନିଜର ।
ଆମ ହିତ ପାଇଁ ଏକାକାର ତାଙ୍କ
ଦିନ ରାତିକୁ କରିଲେ ।
ଆମ ଆଖିଲୁହ ନିରନ୍ତରେ ପୋଛି
ଆମକୁ ବଡ କରିଲେ l
ଆମରି ଦୁଃଖରେ ଦୁଃଖୀ ହେଲେ ସିଏ
ଆମ ସୁଖେ ସୁଖୀ ହେଲେ ।
ଚଳନ୍ତି ଠାକୁର ଆମର ହୋଇ ସେ
ସାରା ଜୀବନ ରହିଲେ ।
ପିତାଙ୍କ ପ୍ରୀତିରେ ସର୍ବ ଦେବ ତୁଷ୍ଟ
ମାତା ବଡ ପୃଥିବୀରୁ ।
ପିତାମାତା ସମ କେଉଁ ଦେବ ଦେବୀ
କେବେ କି ହୋଇବେ ଗରୁ ?
ଧର୍ମ ଅର୍ଥ ମୋକ୍ଷ ସବୁ ମିଳିଥାଏ
ତାଙ୍କରି କୃପା ହୋଇଲେ ।
ପିତା ଧର୍ମ ପିତା ସ୍ୱର୍ଗ ପରଂ ତପ
ବେଦ ପୁରାଣ ଗାଇଲେ ।
