ଚକାଆଖି

ଚକାଆଖି ତୁମ ଦରଶନ ଲାଗି

ଭାବିଲି ମନରେ ମୋର ।

ଦରଶନ ଦେବ ଚକାଆଖି ମୋତେ

ଲଗାଇଲ ଭାବ ଡୋର ।

ଟାଣିନେଲା ଡୋର ଗଲି ଶ୍ରୀମନ୍ଦିର

ଚକାଆଖି ତୁମ ଦେଖି ।

ମନ ମୋ ବୁଡିଲା ଭାବ ଜଳଧିରେ

ଆଖି ମୋର ଗଲା ଲାଖି ।

ଚକାଆଖି ପଦ୍ମ ପଲାଶୁଁ ସୁନ୍ଦର

ପଦ୍ମମୁଖେ ପାଏ ଶୋଭା ।

କଳାଡୋଳା ଦୁଇ ଅଛି ତା ମଧ୍ଯରେ

ଭ୍ରମର ବୋଲି କହିବା  ।

ଭ୍ରମର ମତ୍ତ ନହୋଇ ହୋଇ ସ୍ଥିର

ରତ ସଦା ମଧୁପାନେ ।

ଡୋଳା ନବୁଲଇ ଚକାଆଖି ସ୍ଥିର

ଦେଖିଲି ବେନି ନୟନେ ।

ନୟନୁଁ ମୋ ଜଳ ବହି ଅବିରଳ

ଭିଜିଲା ନୟନ ମୋର ।

ଚକାଆଖିରେ ମୋ ଆଖି ଗଲା ଲାଖି

ଆହେ କାଳିଆ ଠାକୁର ।

କି କିମିଆ ଭରି ଅଛି ସେ ଆଖିରେ

ଲଗାଅ କେତେ ହୁନ୍ଦର ।

କହିବି ବୋଲି ଯା ମନେ ଭାବିଥିଲି

ସବୁ ତା ଗଲା ପାଶୋର ।

ନାଚିଲା ମନରେ ଚକାଆଖି ତୁମ

ତୁମେ ମୋହର ଶକତି ।

ତୁମେ ଦୟାମୟ ମଙ୍ଗଳ ଆଳୟ

ତୁମେ ମୋ ଗତି ମୁକତି ।

ତୁମ ରୂପ ଛବି କାଳେ କାଳେ ମୋର

ନୟନରେ ନାଚୁଥାଉ ।

ମରଣ କାଳରେ ତୁମ ତକାଆଖି

ଦେଖି ମୋ ଜୀବନ ଯାଉ ।