ଚିତ୍ର ଚରିତ - 64 କବିତା : ପଞ୍ଚଭୂତ ସଭା

ସଭା ଚାଲିଥିଲା ପ୍ରକୃତି ଦେବୀର ଥିଲେ ଆକାଶରେ ତାରା,

ଅଗ୍ନି ଜଳ ଆଉ ପବନ ସହିତ ମାଟିମାଆ ବସୁନ୍ଧରା |

ଆକାଶ କହିଲେ-ମୋର ଏ' ଶରୀର ସୂର୍ଯ୍ୟ ଚନ୍ଦ୍ର ତାରା ବାସ,

ଅଗ୍ନି ଜଳିଉଠି କହିଲେ-ମୋ ତାପବିନା ସୃଷ୍ଟିହୁଏ ନାଶ |

ସକଳ ସୃଷ୍ଟିର ଆଧାର ମୁଁ ବୋଲି କହିଦେଲେ ସୂର୍ଯ୍ୟଦେବ,

ପବନ କହିଲେ-ମୁଁ ଜୀବ ଜୀବନ ମୋ ସରି ଆଉ କେ ହେବ ? |

ବସୁନ୍ଧରା ମୁଣ୍ଡ ଟେକି କହିଲେ ମୁଁ ହେଉଛି ସଭିଙ୍କ ମାଆ,

ଜଳ ମାଡ଼ିଆସି କହିଲେ-ମୁଁ ଏକା ଜୀବଜଗତର ସାହା | |

ହସିଲେ ପ୍ରକୃତି କହିଲେ- ତୁମେ ତ ସକଳେ ମୋର ସନ୍ତାନ,

ଗଢିଛି ତୁମକୁ ଜୀବ ହିତପାଇଁ ମୋ ଆଗେ ସବୁ ସମାନ |

ପଞ୍ଚଭୂତ ଭାବେ ଜୀବ ଶରୀରରେ ରହିଛ ରହିବ ଯାଇ,

ଯାହା ଲୋଡ଼ାହେବ ନିଜେ ଯାଚିଦେବ ସଂସାର ମଙ୍ଗଳ ପାଇଁ |

ପ୍ରକୃତିର କଥା ଶୁଣିଲେ ଦେବତା ଭାଙ୍ଗିଗଲା ଅଭିମାନ,

ସଭିଏଁ ଜାଣିଲେ ପ୍ରକୃତି ଦେବୀ ହିଁ ଭଗବତୀ ଭଗବାନ |