ଚିର ନମସ୍ୟ ଶ୍ରୀଜୟଦେବ

ଧନ୍ୟ ତୁମ୍ଭେ ଭକ୍ତ କବି ଭକ୍ତ ଅଗ୍ରଗଣ୍ୟ l

ମହାକବି ତୁମ୍ଭେ ଅଟ ସର୍ବଜନ ମାନ୍ୟ ll

ଧନ୍ୟ ତୁମ ରସକାବ୍ୟ ଶ୍ରୀଗୀତଗୋବିନ୍ଦ l

ନ ଶୁଣିଲେ ଜଗନ୍ନାଥେ ନ ଯାଆନ୍ତି ନିଦ ll

କାମ ଗରଳ ଖଣ୍ଡନେ ପ୍ରଭୁ ଶିରେ ପାଦ l

କେମନ୍ତେ ରଖିବେ ରାଧା ଗଣିଲ ପ୍ରମାଦ ll

ଏହା ଭାବି ଭାବି ଗଲ ସ୍ନାହାନେ ବାହାରି l

ପହଞ୍ଚିଲେ ପ୍ରଭୁ ଛଦ୍ମେ ତୁମ୍ଭ ବେଶ ଧରି ll

ପଦ୍ମା ତୁମ୍ଭେ ଲେଖନୀଟି ଶୀଘ୍ରକରି ଆଣ l

ପାଦ ପୁରାଇଲେ ବସି ସ୍ୱୟଂ ନାରାୟଣ ll

କୃତିରେ ତୁମ୍ଭର ଭରା ଦିବ୍ୟ ପ୍ରେମ ରସ l

ନାୟିକା ରାଧା ନାୟକ ସ୍ଵୟଂ ଜଗଦୀଶ ll

ପ୍ରତେ ହୁଏ ନାହିଁ ଏହା ମନୁଷ୍ୟେ ସମ୍ଭବ l

ସୃଜନୀ ନିଶ୍ଚୟ ଏହା ଶ୍ରୀ ରାଧା ମାଧବ ll

ଶାନ୍ତ କାନ୍ତ ପଦାବଳୀ ଜନ ମନ ହର l

ଅତି ସାବଲୀଳ ପୁଣି ଅତୀବ ସୁନ୍ଦର ll

ନୃତ୍ୟ ପଟ୍ଟିୟସୀ ପଦ୍ମାବତୀ ନୃତ୍ୟଛନ୍ଦ l

ଗୀତଗୋବିନ୍ଦ ଗାୟନ ପଖାଉଜ ନାଦ ll

ଧନ୍ୟ ଖଞ୍ଜିଥିଲେ ପ୍ରଭୁ ତୁମ୍ଭ ଦିବ୍ୟଯୋଡ଼ି l

ପ୍ରଣାମ ଜଣାଏ ମୁହିଁ ବେନି କର ଯୋଡ଼ି ll

ପୂଣ୍ୟ ଜନ୍ମ ତିଥି ତୁମ୍ଭ ଅକ୍ଷୟ ତୃତୀୟା l

ଅକ୍ଷୟ ତୁମ୍ଭର କିର୍ତ୍ତୀ ବିଶ୍ୱ ବନ୍ଦନୀୟା ll

ଧନ୍ୟ ଯୋଗ୍ୟସୂତ ଧନ୍ୟ ଉତ୍କଳ ଜନନୀ l

ନମସ୍ତେ ଗୀତଗୋବିନ୍ଦ ନମଃ ଭକ୍ତାଗ୍ରଣୀ ll