ବୁଝିବ ମହତ୍ତ୍ୱ ତୋର
ବୁଝିବ ମହତ୍ତ୍ୱ ତୋର
![](https://cdn.storymirror.com/static/1pximage.jpeg)
![](https://cdn.storymirror.com/static/1pximage.jpeg)
ତେତିଶ କୋଟି ତୋ ଦେହେ ଦିଅଁ-ଯେଣୁ
ତେଣୁ କାମଧେନୁ ନାଆଁ,
ତୋ ସେବା ପୂଜାରେ ସର୍ଵ ଦେବ ତୋଷ
ହୁଅନ୍ତି ଆପଣା ଛାଆଁ ।
ତୋର କଲ୍ୟାଣରେ ଜଗତ ମଙ୍ଗଳ
ପୁରାଣେ ରହିଛି ତଥ୍ୟ ,
ଧରଣୀ ବକ୍ଷରୁ ଶିରୀ ତୁଟିଯାଏ
କଲେ ତୋତେ ହନ୍ତସନ୍ତ ।
ମାନବ ଜାତିର କଲ୍ୟାଣ ସକାଶେ
ବିଧାତା ଗଢ଼ିଲେ ତୋତେ ,
ମାଆ ଭଳି ତୁ ଲୋ ସାହା ହେଉ ପରା
ମଣିଷକୁ କେତେ ମତେ ।
ନିରୀହ,କୋମଳ ସ୍ଵଭାଵଟି ତୋର
ଅଳପରେ ତୋଷ ହେଉ ,
ଗଣ୍ଡାଏ ଖାଇ ତୁ ମୁନ୍ଦାଏ ପିଇକି
ମାନବ ସେବାରେ ଥାଉ ।
ଯେତେ ସବୁ ତୋର ଉତ୍ତର ଦାୟାଦ
କରନ୍ତି ବି ଏଇ ସେବା ,
ବିନା ପ୍ରତିବାଦେ ପୀଢ଼ି ପୀଢ଼ି ଧରି
ଶିଖିଛନ୍ତି ଖାଲି ଦେବା ।
ହେଲେ ଏ ମଣିଷ କାହିଁକି ଏମିତି
ଆଜି ଅମଣିଷ ହୁଏ ,
ଏତେ ଉପକାର କଲେ ବି ତାହାର
ଭାବୁନାହିଁ ମାଆଟିଏ ।
ପଶୁଟିଏ ବୋଲି ଭାବିଦେଇ ସେ ତ
ମାତିଛି ଲାଳସା ପଛେ ,
ଡାକି ଆଣୁଅଛି ସବୁ ବିପତ୍ତିକୁ
ତୋହର ଦୀର୍ଘ ନିଃଶ୍ୱାସେ ।
କେବେ ତା'ର ବୁଦ୍ଧି ଉଦୟ ହୋଇବ
ବୁଝିବ ମହତ୍ତ୍ୱ ତୋର ,
ତୋ ହିତ ସାଧନେ ଧ୍ୟାନ ଦେବ-ଆଉ
ଭାବିବ ମାଆଟି ମୋର ।