ବର୍ଷା ସହ କିଛି ସ୍ମୃତି
ବର୍ଷା ସହ କିଛି ସ୍ମୃତି
ମନେ ପଡେ ଆଜି ସେଇ ବର୍ଷା ରାତି
ଚାରିଆଡେ ଅନ୍ଧକାର
ଦୂରଦୁରାନ୍ତକୁ ଚାହିଁଲେ କେହି ବି
ଆସୁନଥିଲେ ନଜର |
ଘଡଘଡି ସାଥେ ବିଜୁଳି ଚମକ
ହେଉଥିଲା ଭୟଙ୍କର
ହାତକୁ ଭିଡି ମୋ ପାଖେ ଆସୁଥିଲ
ଥରୁଥିଲା ଏ ଶରୀର |
କିଛି ଦୂରେ ଏକ ଆଶ୍ରୟ ସ୍ଥଳଟି
ଦେଖିଦେଇ ଥିଲେ ଯେବେ
ମନରେ ଆଶ୍ବସ୍ତ ଆସିଲା ଆମର
ରାତି କଟିଯିବ ଏବେ |
ସେଇ ଘରେ ଥିଲେ ବୁଢ଼ା ବୁଢ଼ୀ ଦୁଇ
ଆମକୁ ଦେଲେ ଆଶ୍ରୟ
ନିଜ ପିଲା ପରି ଯତ୍ନ ଆମ ନେଲେ
ରହିଲାନି ଆଉ ଭୟ |
ସାଙ୍ଗହୋଇ ଆମେ ଗୋଟେ ଟେବୁଲରେ
ଖାଇବାକୁ ବସିଥିଲେ
ପରିଚୟ ଦେଇ ଦୁହେଁ ଦୁହିଁଙ୍କର
ଆନନ୍ଦିତ ହୋଇଥିଲେ |
ଗୋଟିଏ ରୁମରେ ରହିବାକୁ ଦେଲେ
ପରିଚୟ ସ୍ୱାମୀ ସ୍ତ୍ରୀର
କେମିତି କୁହନ୍ତି ତାଙ୍କ ଆଗେ କଥା
ପ୍ରେମିକ ମୁଁ ପ୍ରେମିକାର |
ଗୋଟେ ବିଛଣାରେ ଶୋଇବାକୁ ଗଲେ
ପ୍ରଥମ ଏ ଅନୁଭୂତି
ବିବାହ ପୂର୍ବରୁ କିଛି ହେବ ଭାବି
ଥରୁଥିଲା ଆମ ଛାତି |
ଅଳ୍ପ ପାଖ ଆସି ଘୁଞ୍ଚି ଯାଉଥିଲ
ଲାଜରେ ଝାଉଁଳି ଯାଇ
କହିବାକୁ କିଛି ଚାଁହୁଥିଲା ହେଲେ
ଓଠ ଥିଲା ଚୁପ୍ ହୋଇ |
ଆଖି ମିଶିଥିଲା ନିଶବ୍ଦ ରାତିରେ
ସ୍ପନ୍ଦନ ଶବଦ ଶୁଣି
କେତେବେଳେ ନିଦ ଲାଗିଲା ଆଖିରେ
ପାରିଲେନି ଆମେ ଜାଣି |
ସୂର୍ଯ୍ୟର କିରଣେ ନିଦ ମୋ ଭାଙ୍ଗିଲା
ଆଖି ଖୋଲି ଯେବେ ଚାହେଁ
ବିଶ୍ୱାସ ହେଲାନି ଶ୍ମଶାନ ଭିତରେ
ଶୋଇଥିଲୁ ଆମେ ଦୁହେଁ |
ସେଦିନ ଘଟଣା ଭୂଲି ପାରିବିନି
ପ୍ରେମ ସାଥେ ଥିଲା ଭୟ
ଦୁଇଟି ଜୀବନେ ନୂଆ ଘଟିଥିଲା
ଭାବିଲେ ଥରେ ହୃଦୟ |