Library
ବନ୍ଧୁଟେ ଖୋଜୁଛି
ବନ୍ଧୁଟେ ଖୋଜୁଛି
ପତ୍ର ଝଡା ବୃକ୍ଷେ ପତ୍ର ଝଡି ଯାଏ
କିଛି ଦୃଶ୍ୟମାନ ହୁଏ
ବିପଦ ସମୟେ ପାଖେ ଥାଏ ଯିଏ
ପ୍ରକୃତରେ ବନ୍ଧୁ ସିଏ |
ବନ୍ଧୁ ଓ ବନ୍ଧୁତା ଦୁଇଟିର ମୂଲ୍ୟ
ରଖିଛି ଯିଏ ହୃଦୟେ
ଯେତେ ବଡ଼ ଦୁଃଖ ଆସୁବି ଜୀବନେ
ରକ୍ଷାକରେ ସେ ସମୟେ |
ଜୀବନରେ କେତେ ବନ୍ଧୁ ମିଳିଯିବେ
ପ୍ରକୃତ ବନ୍ଧୁଟି ସେଇ
ଯିଏ ସ୍ୱାର୍ଥ ନୁହେଁ ଭଲପାଉଥିବ
ଅନ୍ଧର ଲଉଡ଼ି ହୋଇ |
ଜୀବନ ପଥରେ ବନ୍ଧୁ ଆବଶ୍ୟକ
ଚାଲେ ସେ ହାତକୁ ଧରି
ସୁଖ ଦୁଃଖ ହେଉ ଅବା ମନ କଥା
ଶୁଣେ ସେ କାନକୁ ଡେରି |
ସମୁଦ୍ର ଗର୍ଭରୁ ମୁକ୍ତା ମିଳିଥାଏ
ନଦୀ ଗର୍ଭେ ଶାଳଗ୍ରାମ
ପ୍ରକୃତ ବନ୍ଧୁଟେ ସଂସାରେ ଖୋଜିଲି
ବୃଥାରେ ଗଲା ମୋ ଶ୍ରମ |
ସୁଦାମ ପରିକା ବନ୍ଧୁଟେ ଖୋଜୁଛି
ନ ଥାଉ ତା ପାଖେ କିଛି
ଖୁଦ କଣିକାରେ ଖୁସି ହୋଇ ନିଜେ
ଲୁହ ତାର ଦେବି ପୋଛି |
କର୍ଣ୍ଣ ପରି ପଣ କରିବି ତା ଆଗେ
ବନ୍ଧୁତ୍ୱର ରଖି ମାନ
ସୁରକ୍ଷା ଯେ ତାର କରୁଥିବି ସଦା
ଥିବାଯାଏ ମୋ ଜୀବନ |
ପୁରାଣରେ ଆଉ ଅଛି ଇତିହାସେ
ବନ୍ଧୁତାର ବହୁ ଲେଖା
ଜୀବନ ଦୀପରେ ଜଣେ ଘିଅ ହେଲେ
ଜଣେ ଆଲୋକର ଶିଖା |
କୋଇଲା ଖଣିରୁ ହୀରା ମିଳିଥାଏ
କେତେ ଅବା ମୂଲ୍ୟବାନ
ଏପରି ବନ୍ଧୁଟେ ପାଇଥିବ ଯିଏ
ସିଏ ହେଲା ଭାଗ୍ୟବାନ |
