ମାୟା ସଂସାର
ମାୟା ସଂସାର
ସଂସାର ସାଗରେ ପଂହଁରୁଛେ ଆମେ
ପ୍ରଫୁଲ୍ଲିତ କରି ମନ
ଥକିଯିବ ଯେବେ ଆମ ହାତ ଗୋଡ
ବୁଡି ଚାଲିଯିବ ପ୍ରାଣ |
ବଞ୍ଚିବାର ବାଟ ଖୋଜୁ ଥାଉ ଯଦି
ଧରୁଥାରେ ତାର ନାମ
ଅଥଳ ଜଳରୁ ଉଦ୍ଧାର କରିବ
ଦଇବ ଦଉଡ଼ି ସମ |
ମାୟାର ସଂସାର ଭାରି ଭଲ ଲାଗେ
ମାୟାରେ ବୁଡି ରହିଲେ
ଆଧ୍ୟାତ୍ମିକତା ତୋ ଜାଗ୍ରତ ହୋଇବ
ତା ସାଥେ ଭାବ ବାନ୍ଧିଲେ |
ସଂସାର କରିବା କିଛି ଭୂଲ ନୁହେଁ
ବିଧିର ନିୟମ ଏହି
ଯାହା ପାଇଁ ଆଜି ଦୁନିଆ ଦେଖୁଛେ
ତା ପାଇଁ ସମୟ ନାହିଁ |
ଜୀବନର କିଛି ମୂହୁର୍ତ୍ତ ତୋହର
ତା ନାମରେ ହେଉ ଲେଖା
ଜୀବ ଗଲା ବେଳେ କୃପା ଯଦି ହୁଏ
ତା'ସାଥେ ହୋଇବ ଦେଖା ।
ଯଉଠି ଯାହାବି ଯେମିତି ରହିଛି
ରହିଥିବ ସବୁବେଳେ
ଖାଲି ହାତେ ଆସି ଲୋଭର ଶିକାରେ
ନବାପାଇଁ ମନ ବଳେ |
କହୁଥିବୁ ଯେତେ ତୋରମୋର ଆଉ
ମନରେ ରଖିବୁ ଇର୍ଷା
ସମ୍ପର୍କ ଦଉଡି ଛିଡି ସଭିଙ୍କଠୁ
କେହି ନହେବେ ଭରସା |
ଋତୁଚକ୍ର ବୁଲି ଖରା ବର୍ଷା ଶୀତ
ଚାଲିଛି ମାନି ନିୟମ
ସେମିତି ଆସୁଛି ସୁଖ ପରେ ଦୁଃଖ
ନ ଡରି କରିବା କର୍ମ ।
କର୍ମ କରିଚାଲ ଫଳର ଆଶାକୁ
ରଖ ନାହିଁ ମନେ କେବେ
ପାଇବାର ଯିଏ ଯୋଗ୍ୟଥାଏ ତାକୁ
ମିଳେ ଦରକାର ଯେବେ |
ଆଜିର ସମୟ କାଲି ଆସିବନି
ସଭିଙ୍କୁ ଏ କଥା ଜଣା
କରମ ସହିତ ତା ନାମ ଧରିଲେ
ହେବାନାହିଁ ବାଟବଣା |