ଅଧୁରା ସ୍ବପ୍ନ
ଅଧୁରା ସ୍ବପ୍ନ
ତୁମକୁ ଦେଲି ମୁଁ ମୋ ପ୍ରେମର ରାଣ
କରିବନି ମତେ ପର
ସାଥି ହୋଇ ରହିବାକୁ ତୁମ ସାଥେ
ଲେଖା ନାହିଁ ମୋ ଭାଗ୍ୟର |
ରହିଲେବି ତୁମଠାରୁ ଯେତେ ଦୂରେ
ତୁମେ ଅଛ ମୋ ମନରେ
ଆକାଶ ଧରିତ୍ରୀ ଅଲଗା ହେଲେବି
ଯୋଡି ହୁଏ ବରଷାରେ |
ଅଜଣାରେ ଗୋଟେ ଭୂଲ୍ ହୋଇଗଲା
ହଜିଗଲା ମୋର ଖୁସି
ବିଶ୍ୱାସରେ ବିଷ ଦେଇଦେଲା ବନ୍ଧୁ
ହୋଇଗଲି ପରଦେଶୀ |
ସାଧବପୁଅ ମୁଁ ବାଣିଜ୍ୟ ଲୋଭରେ
ଆସିଥିଲି ପରଦେଶ
ଛଳ କରି ବନ୍ଧୁ ନେଇଗଲା ସବୁ
ଭୋଗୁଛି ମୁଁ କାରାବାସ |
ଭରସା ବିଶ୍ୱାସ ରଖି ମୁଁ ପ୍ରେମରେ
କାଟେ ଦିନ ନିରବରେ
ସମୟ ସରୁନି ସବୁ ଏକା ଲାଗେ
ଦିନ ରାତି ମୋ ପାଖରେ ।
ଆସିଥିଲି ଏଠି ଭାବିଥିଲି କିଛି
ଧନ ଉପାର୍ଜନ କରି
ତୁମକୁ ବିବାହ କରିବି, ଘରକୁ
ଆଣିବି ହାତକୁ ଧରି ।
ସବୁ କାହାଣୀର ଶେଷ କି ମିଳନ
ବିଛେଦ ବି ହୋଇଥାଏ
ପାଇବାର ଖୁସି ଅଧିକ ହୁଏନି
ତ୍ୟାଗରେ ଯା ମିଳିଥାଏ ।
ସ୍ଵପ୍ନ ତ ଦେଖିଛି ଜୀବନେ ଅନେକ
ତୁମକୁ ସାଥିରେ ନେଇ
ଏବେ ଲାଗେ ମୋତେ ସବୁ ସ୍ବପ୍ନ ମୋର
ରହିବ ଅଧୁରା ହୋଇ ।
କେବେବି ଭାବିନି ତୁମଠୁ ଅଲଗା
ବଞ୍ଚିବା ହେବ ଏମିତି
ଜଳର ଅଭାବେ ଛଟପଟ ହୁଏ
ବିଚରା ମୀନ ଯେମିତି ।
ଭେଟ ହେବନାହିଁ ତୋରମୋର ଆଉ
ହେବ କାଳେ ଯଦି ମଲେ
ଦୁଃଖ କରିବନି ଜୀବନ ଜିଇଁବ
ସଂସାର କରିବ ଭଲେ ।