ବଳେ ଯାଚିଦେବ ପୁରସ୍କାର

ପ୍ରଥମ ଭାଗ :

କବି ଚଲାପଥ ବଡ଼ କଣ୍ଟକିତ ନୁହେଁ ସିଧା-ସଫା-ପରିଷ୍କାର ,

ଆଶା ରଖିଥାଏ ଅବାଟରେ ଚାଲି କରିଦେବ କିଛି ଆବିଷ୍କାର ।

କବି ନିଜଲୋକ ମଝିରେ ମଝିରେ କରୁଛନ୍ତି ମୃଦ୍ୟୁ ତିରସ୍କାର,

ସମାଜ ବି କବିକର୍ମ ଦେଖି ଦିନେ କରି ଦେଇପାରେ ବହିଷ୍କାର ।

କେହି ଜଣେ କବି ଗୁଣଚିହ୍ନି କରି ଦେଉଛନ୍ତି ନମସ୍କାର,

ସମୟ ଆସିବ ଆପଣ ବି ଦିନେ ଯାଚିଦେବେ ତାକୁ ପୁରସ୍କାର ।(1)

ଦ୍ଵିତୟ ଭାଗ:

କେଉଁ ପୁଣ୍ୟବଳେ ଲେଖାଲେଖି କରି ଲେଖକ ହୋଇଛି ମୁହିଁ,

ଧନ ଆସେ ନାହିଁ ଜ୍ଞାନର ସାଗରେ ନିତି ସ୍ନାନ କରୁଥାଇ ।

ଶବ୍ଦବ୍ରହ୍ମ ମୋର ଆତ୍ମାକୁ ଆଚ୍ଛନ୍ନ କରିଥାଏ ସବୁବେଳେ,

ଜନ ହିତକଥା ଈଶ୍ଵରଙ୍କ ବାର୍ତ୍ତା ଆସିଯାଏ ବଳେବଳେ ।

କିଛି କଟୁକଥା ବ୍ୟଙ୍ଗହୋଇ ଆସେ ସମାଜ ସୁଧାର ପାଇଁ,

କେହିଜଣେ ପଢି ପ୍ରଶଂସା କରିଲେ ଅନ୍ତରାତ୍ମା ଉଠେଚେଇଁ ।

କିଛି ପାଇବାର ଆଶାନାହିଁ ଯେଣୁ ସୁଖରେ କଟୁଛି ଦିନ,

ଲେଖା ସରିଗଲେ ଶୁଣେଇ ଦେବାକୁ ମନହୁଏ ଛନଛନ ।

ଭଲକାମ କିଛି କରୁଛି ଭାବେ ମୁଁ ଚିନ୍ତା ମୋଟେ କରେନାହିଁ,

ପାଠକ ମୋ ପାଇଁ ଜନାର୍ଦ୍ଦନ ହରି ସମର୍ପିତ ତାଙ୍କପାଇଁ ।(2)