ବିଷାକ୍ତ ସହର

ଦୁନିଆର ପ୍ରତି କ୍ଷେତ୍ରେ ବିଦ୍ୟମାନ

      କିଛି ମନ୍ଦ କିଛି ଭଲ,

ପାପ ଅବା ପୂଣ୍ୟ, ଅମୃତ ବା ବିଷ

      ରହେ ହୋଇ ସମତୁଲ |

ମଣିଷ ସ୍ୱାଧୀନ ବାଛିନେବା ପାଇଁ

      ନିଜ ଇଛାବଳେ ଏକ,

ପରିଣାମ ତାକୁ ଭୋଗିବାକୁ ହୁଏ

      କର୍ମ ମତେ ଦୁଃଖ ସୁଖ |

ଯୁଗ ଯୁଗ ଧରି ମଣିଷ ଚାଲିଛି

      ଉନ୍ନତିର ପଥେ ପଥେ,

ବିଜ୍ଞାନର ଦାନେ ବଞ୍ଚିବାର ଶୈଳୀ

      ବଦଳି ଯାଇଛି କେତେ |

ଗଢି ଉଠିଛି ଯେ ସହର ବଜାର

      ଶିଳ୍ପର ଉତଥାନ ହୁଏ,

ଅର୍ଥ ଲାଳସାରେ ଧାଉଁଛି ମଣିଷ

      ମନୁଷ୍ୟତ୍ୱ ଭୁଲିଯାଏ |

ମନେ ମନେ ଭାବେ ଉନ୍ନତିର ପଥେ

      ଆଗେଇଚାଲିଛି ସିଏ,

କିନ୍ତୁ ଅବନତି ମାନସିକ ସ୍ଥିତି

      ଅମାନବିକତା ଗ୍ରହେ |

ହିଂସା, ଦ୍ୱେଷ ଆଉ ପରଶ୍ରୀକାତର

     ଗୁଣ ସବୁ ଆଚରଣେ,

ପରିବେଶ ତାର ବିଷାକ୍ତ ବଳୟେ

      ମରେ ଜନ ପ୍ରତିକ୍ଷଣେ |

ପୁଞ୍ଜି ପାଇଁ ଆଜି ପ୍ରତିଯୋଗିତାରେ

      ସହର ହୁଏ ବିଷାକ୍ତ,

ନରହତ୍ୟା ଭଳି ଅପରାଧ ମାନ

      ହୋଉଥାଏ ସଂଗଠିତ |

ଆମୋଦ ପାଇଁ ଯେ ନିର୍ମିତ ହୋଇଛି

      ପଞ୍ଚତାରକା ହୋଟେଲ,

ରାତ୍ରିର ଅନ୍ଧାରେ ମିଳିଥାଏ ସେଠି 

      ସୁରା ସାକୀ ପ୍ରୀତି ଭଲ |

ନାରୀର କୋମଳ ମାଂସରେ ପ୍ରଲୁବ୍ଧ

      ମଦ୍ୟପି ନଷ୍ଟ ପୁରୁଷ,

ପୁତି ଗନ୍ଧମୟ ଗଳିକନ୍ଧି ସବୁ

       ସହର ଆଜି ବିଷାକ୍ତ |

ଅତୀତେ ସଂସ୍କୃତି ହଜି ସାରିଲାଣି

       ପଲ୍ଲୀଠୁ ସହର ଯାଏ,

ସତେ କି ପୃଥିବୀ ପାଲଟି ଗଲାଣି

       ବିଷାକ୍ତ ସହରଟିଏ |