ବିଷ

ସାଗର ସିନା ରତ୍ନ ଭଣ୍ଡାର ତହିଁରେ ଅଛି ବିଷ,

ସେ ବିଷ ପୁଣି ଜୀବ ଜଗତ କରି ପାରିବ ନାଶ |

ସାପ ଦାନ୍ତରେ ରହିଛି ବିଷ ପ୍ରାଣୀକୁ ମାରିପାରେ,

ମହୁମାଛିର ରହିଛି ବିଷ ବିଛାର ନାହୁଡ଼ରେ |

ବେଙ୍ଗ ପିଠିରେ ଝିଟିପିଟିର ଚମଡ଼ା ତଳେ ବିଷ,

ସଁ-ବାଳୁଆ ଲୋମର ପୁଣି ପୋକ ଲାଳରେ ବିଷ |

ଗଛ ପତର ଔଷଧ ସିନା ଆଉ କେତେକ ବିଷ,

ଫଳ ମୂଳରେ ଅମୃତ ପୁଣି ଆହୁରି କିଛି ବିଷ |

ରାସାୟନରେ ଫସଲ ହୁଏ ସେଥିରେ ଅଛି ବିଷ,

ମଦରେ ନିଶା ରହିଛି ସିନା ଶରୀର ପାଇଁ ବିଷ |

ସୂର୍ଯ୍ୟ କିରଣ ଦେହକୁ ହିତ ପୋଡ଼ିପାରେ ସେ ଚମ,

ଅତିବ ବାଇଗଣିଆ ରଶ୍ମି ବିଷ ପରି ତା' କାମ |

ପାଣି ପଵନ ଆମ ଜୀବନ ଦୂଷିତ ହେଲେ ସିଏ,

ସେଥିରୁ ବିଷ ହୁଏ ଉତ୍ପନ୍ନ ଆମ ଜୀବନ ନିଏ |

ମୂର୍ଖ ତୁଣ୍ଡରେ ରହିଛି ବିଷ କହେ ସେ କଟୁକଥା,

ବୋକାଙ୍କ ପାଇଁ ଶିକ୍ଷା ହିଁ ବିଷ, ଜ୍ଞାନ ତା'ପାଇଁ ପିତା |

ମିଛୁଆ ପାଇଁ ସତ୍ୟଟି ବିଷ ଚୋର ପାଇଁ ଆଲୋକ,

ଘୁଷୁରୀ ପାଇଁ କଦଳୀ ବିଷ ଲବଣ ମାରେ ଜୋକ |

ଆମ ଜିଭରେ ଅଛି ଅମୃତ ଲୁଚି ରହିଛି ବିଷ,

ଅପ୍ରିୟ ସତ୍ୟ କଟୁକଥାଟି ସଂପର୍କ କରେ ଧ୍ଵଂସ |

ଅସଭ୍ୟ ଭାଷା ରାଗରେ ରୁଷା ବିଷକୁ ଦିଏ ବୁଣି,

ବିଷକନ୍ୟାର ମଧୁର କଥା ବିପଦ ଆଣେ ଟାଣି |

କ୍ରୋଧର ବିଷ ଈର୍ଷାର ବିଷ ନିଜର କ୍ଷତିକରେ,

ଜାଣି ନ ଜାଣି ପିଇଲେ ବିଷ ଭଲ ମଣିଷ ମରେ |

000