ବିରଜା ମଣ୍ଡଳ
ବିରଜା ମଣ୍ଡଳ
ପ୍ରାଚୀନ କଟକ ବିରଜା ମଣ୍ଡଳ
ଦକ୍ଷିଣେ ପବିତ୍ର ପୁଣ୍ୟ
ଅଶ୍ୱମେଧ ଯଜ୍ଞ କରିଥିଲେ ବ୍ରହ୍ମା
କହେ ବାମନ ପୁରାଣ ।
ବିଜେ ମହାଶକ୍ତି ଗିରିଜା ବିରଜା
ଦୁର୍ଗେ ମହିଷାମର୍ଦ୍ଦିନୀ
ପୀଠ ଉଡ୍ଡୀୟାନେ ସୁପ୍ରତିଷ୍ଠ ମାତା
କଟିତଟେ ଓଡିଆଣୀ ।
ମସ୍ତକରେ ଶୋହେ ନାଗରାଜ ଯୋନି
ଗଣପତି ଶିବଲିଙ୍ଗ
ଶିରେ ଅର୍ଦ୍ଧଚନ୍ଦ୍ର ଅନନ୍ୟା ଦ୍ୱିଭୂଜା
ବିନାଶନ୍ତି ରଜତମ ।
ସ୍କନ୍ଦ ପୁରାଣର ଉତ୍କଳଖଣ୍ଡରେ
ବର୍ଣ୍ଣିତ ଦେବୀ ମହିମା
ଦକ୍ଷ ଯଜ୍ଞ କାଳେ ସତୀଙ୍କର ନାଭି
ପଡି ହେଲା ନାଭିଗୟା ।
ବିଷ୍ଣୁ ଭଗବାନ ଗୟା ଅସୁରକୁ
ଚାପିଲେ ପାତାଳପୁର
ଧର୍ମ ପୁଣ୍ୟ କ୍ଷେତ୍ର ଏଣୁ ନାଭିଗୟା
କହଇ ବାୟୁ ପୁରାଣ ।
ଶ୍ରୀ ଆଦିଶଙ୍କର ତନ୍ତ୍ର ଚୂଡାମଣି
ବର୍ଣ୍ଣନୀୟ ଶକ୍ତିପୀଠ
ଭୈରବୀ ବିରଜା ଗୁପ୍ତ ରାଜ କାଳୁ
ଆଦିଶକ୍ତି ସୁବିଖ୍ୟାତ ।
ଏକ ହସ୍ତେ ଶୂଳ ଅନ୍ୟ ହସ୍ତେ ମାଆ
ମହିଷା ଲଙ୍ଗଳ ଧରି
ନିଧନ କରନ୍ତି ପଶୁ ପ୍ରବୃତ୍ତିକୁ
ଦୁର୍ଗା ରୂପେ ଅବତରି ।
ମାଘ ଅମାବାସ୍ୟା ତ୍ରିବେଣୀ ତିଥିରେ
ବିରଜାଙ୍କ ଜନ୍ମଦିନ
ମହାପାର୍ବଣରେ ଚଢ଼ି ସି°ହଧ୍ୱଜ
ପରିକ୍ରମା ନବଦିନ ।
ବେଢ଼ା ଚଉପାଶେ ଚଳେ ଦିବ୍ୟ ରଥ
ବ୍ରହ୍ମା ହୁଅନ୍ତି ସାରଥି
ସ୍ୱର୍ଣ୍ଣ ଶଙ୍ଖଚୂଡ଼ ନାଗର ଦଉଡ଼ି
ଟାଣନ୍ତି ଅଶ୍ୱ ଦୁଇଟି ।
ଆନନ୍ଦ ଉଲ୍ଲାସେ ପାଳିତ ହୁଅଇ
ରଜ ପ୍ରଥମ ଅଷ୍ଟମୀ
ସତୀ ସାବିତ୍ରୀଙ୍କ ହୁଏ ପୂଜାର୍ଚ୍ଚନା
ବ୍ରତ କୁମାର ପୂର୍ଣ୍ଣମୀ ।
ନାଭିଗୟା କୁଣ୍ଡେ ପିଣ୍ଡଦାନ କଲେ
ପିତୃଗଣଙ୍କ ମୁକତି
ବାରୁଣୀ ତୀର୍ଥର ବୈତରଣୀ ବୁଡ଼
ଭାଗ୍ୟେ ଥିଲେ ହୁଏ ପ୍ରାପ୍ତି ।
ବହୁ ଦିବ୍ୟ କୀର୍ତ୍ତି ଐତିହ୍ୟ ସମ୍ପନ୍ନ
ଯଜ୍ଞପୁର ଯାଜନଗ୍ର
ବୈତରଣୀ ବିପ୍ର ବିରଜା ବରାହ
ସୁପବିତ୍ର ବେଦପ୍ଲୁତ ।
ଗଙ୍ଗା ଗୟା ପୁରୀ ତୀର୍ଥ ଚାରିଧାମ
ସାତଥର ଥାଅ କରି
ଥରୁଟିଏ ମାତ୍ର ବିରଜା ଦର୍ଶନେ
ସବୁ ପାପ ଯାଏ ଛାଡ଼ି ।