Library
Profile
ବିଭାବରୀ
ବିଭାବରୀ
ଦିବସର ଅନ୍ତେ କ୍ଷଣଦା ଗମନ୍ତେ
ମହୀ ହୁଏ ଅନ୍ଧକାର
ଆଲୋକ ନିବାରି ରଚେ ବିଭାବରୀ
ପ୍ରକୃତିର ଅଭିସାର ll
ବ୍ୟସ୍ତ ଜନପଦ ସରସୀ କୁମୁଦ
ନୀରବେ ଯାଆନ୍ତି ଶୋଇ
ନିର୍ଜନତା ଭାଙ୍ଗେ ଝିଙ୍କାରିର ଶବ୍ଦ
ଶୂନଶାନ୍ ପଥ ଦେଇ ll
ଶୃଗାଳର ରଡି ଦିଅଇ ବିଗାଡି
ଗ୍ରାମ ସୀମନ୍ତିନୀ ନିଦ
ପାଦପ ପତରେ ନିକାଞ୍ଚନେ ବସି
ଖଦ୍ୟୋତ କରଇ ଖେଦ ll
ତଥାପି ଅନ୍ଧାର ନପାରଇ ନାଶି
ତା'ର ମିଞ୍ଜି ମିଞ୍ଜି ଜ୍ୟୋତି
ଏଇ ଦୁଃଖ ତାକୁ ଦେଇଛି ଦଇବ
ଉପହାସେ କରେ ଭୀତି ll
<
/p>
ଯାମିନୀ ବଢିଲେ ନିଶା ଗରଜିଲେ
ବିହରନ୍ତି ଅଶରୀରୀ
ଦୂର ତାଳବଣ, ବିଲଠୁ ଅଙ୍ଗନ
ଶଙ୍କାରେ ଉଠଇ ପୂରି ll
ପାହାନ୍ତି ପ୍ରହରେ ଉତ୍ତର ଆକାଶେ
ଦୃଶ୍ୟ ହୁଏ ଧ୍ରୁବତାରା
ପକ୍ଷୀ କାକଳିରେ ନିନାଦିତ ହୁଏ
ବ୍ରାହ୍ମମୟ ହୁଏ ଧରା ll
ଅପସରି ଯାଏ ମହୀରୁ ଶର୍ବରୀ
ଆସଇ ପ୍ରତ୍ୟୁଷ କାଳ
ନିର୍ମଳ ଆକାଶେ ନିଦ୍ରା ତେଜି ଖଗ
ଉଡିଯାନ୍ତି ଦଳ ଦଳ ll
ନିଦ୍ରା ବରଜିଣ ଆଳସ୍ୟ ତେଜିଣ
ଉଠନ୍ତି ଜଗତବାସୀ
ନିଜ ନିଜ କର୍ମେ ଲାଗନ୍ତି ସଭିଏଁ
ପ୍ରକୃତି ଉଠଇ ହସି ll
