ବିବାହର ପ୍ରକାର

ପ୍ରଜାପତି ଘଟସୁତ୍ର ବିବାହ ବନ୍ଧନ

ନାରୀ ପୁରୁଷ ମିଳନ ସଂସାର ସର୍ଜନ |

ଚାରି ପ୍ରକାର ବିବାହ ଅଛି ଶାସ୍ତ୍ରମତ 

ବୈଦିକ, ବାକଦତ୍ତ, ସ୍ୱୟଂମ୍ବର ଗାନ୍ଧର୍ବ୍ୟତ |

ସବୁଠାରୁ ଶ୍ରେୟ ଅଟେ ବୈଦିକ ପଦ୍ଧତି

ବେଦମନ୍ତ୍ରେ ବର କନ୍ୟା ବେଦୀରେ ବସନ୍ତି |

ଜାତକ ମେଳକ ଯୋଗ ଲଗ୍ନ ସ୍ଥିରୀକୃତ

ଉଭୟ ପକ୍ଷର ଗୁରୁଜନଙ୍କ ଗୃହୀତ |

ବ୍ରାହ୍ମଣ କରନ୍ତି ଏହି କର୍ମ ସମ୍ପାଦନ

ଭୋଜିଭାତ ମହୋତ୍ସବ ଆତ୍ମୀୟ ସ୍ୱଜନ |

ବାକଦତ୍ତ ବିବାହ ଏକ ପ୍ରତିଶ୍ରୁତିବଦ୍ଧ

ବହୁପୂର୍ବୁ ବର କନ୍ୟା ପକ୍ଷର ସମ୍ବନ୍ଧ |

କ୍ଷତ୍ରିୟମାନଙ୍କରଟି ଥାଏ ସ୍ଵୟଂବର

ପଣ ଯେ ପୂର୍ଣ୍ଣ କରଇ ଧରେ କନ୍ୟା କର |

ଶିବ ଧନୁ ଭାଙ୍ଗି ରାମ ବିଭା ମଇଥିଳୀ 

ମହାଲାଖ ବିନ୍ଧି ପାର୍ଥ ଲଭିଲେ ପାଞ୍ଚାଳି |

କନ୍ୟା କରେ ସ୍ୱୟଂବରେ ସ୍ୱବର ଚୟନ

ମନ ଲାଖି ପତି ଗଳେ ମାଲ୍ୟ ଅରପଣ |

ଦମୟନ୍ତୀ ନଳ ମଦୟନ୍ତୀ ସଉଦାସ

କୁନ୍ତୀ ପାଣ୍ଡୁଙ୍କୁ ସାବିତ୍ରୀ ସତ୍ୟବାନେ ଆଶ |

ଗାନ୍ଧର୍ବ ମତରେ ବର କନ୍ୟା ପରସ୍ପର

ରାଜିନାମା ସ୍ୱୀକୃତିରେ ହୁଏ ବିଭାଘର |

ସମ୍ବରଣ ତପତି ଗାନ୍ଧର୍ବ ବିଭାଘର

ପୁରୁରବା ଉର୍ବଶୀ ଯଯାତି ଶର୍ମିଷ୍ଠାର |

ଆଜିକାଲି ପିତାମାତା ଅଜ୍ଞାତସାରରେ

ମାଳ ମାଳ ବିଭାଘର ଗାନ୍ଧର୍ବ ମତରେ |

କେହି ଦେବାଳୟେ କେହି ଅବା ନ୍ୟାୟାଳୟେ

ସାବାଳକ ବରକନ୍ୟା ରାଜିରେ ଏ ହୁଏ |

ଏବେ ଉଚ୍ଚ ଶିକ୍ଷାଧାରୀ ପାଶ୍ଚାତ୍ୟ ନୀତିରେ

ଚୁକ୍ତି ଅବଧି ବିବାହ କରନ୍ତି ଅଚିରେ |

ବିବାହ ପୂର୍ବରୁ ସମ୍ପର୍କିତେ ରହିଥାନ୍ତି

ଏପରି ବିବାହେ ବହୁ ଧୋକା ଖାଇଥାନ୍ତି |

ବସ୍ତ୍ର ପାଲଟିବା ପରି ଅଦଳ ବଦଳ

ପଶୁତ୍ୱ ବିବାହ ଏତ ନରକ ଆବିଳ |

ଏଣୁ ବୈଦିକ ସଂସ୍କୃତି ହେ ନର ଆଚର

ହସିବ ସଂସାର ଏକ ପତ୍ନୀ ବ୍ରତ ଧର |