Library
ବିବାହ ବଜାର
ବିବାହ ବଜାର
ଆଉ କେତେ କାଳ ପିନ୍ଧି ଶାଢୀ ଚୁଡ଼ି ଗହଣା
ମଥାରେ ଟାଣି ହାତେ ଲମ୍ବର ଓଢ଼ଣା
କରି ଷୋଡ଼ଶ ଶୃଙ୍ଗାର ମୁହିଁ ସାଜୁଥିବି
ହାଡ଼ ମାଂସର ବିଳାସୀ କଣ୍ଢେଇ ବିବାହ ବଜାରେ ।
ଆଉ କେତେ କାଳ କରୁଥିବି ସଲ୍ଲଜେ ସାମନା
ଅସଂଖ୍ୟ ଜଟିଳ - କୁଟିଳ - ପ୍ରଶ୍ନିଳ ଆଖିର
ଦେଉଥିବି ନାନାଦି ବକ୍ର ପ୍ରଶ୍ନର ଉତ୍ତର
ଇଛା ଥାଉ ବା ନଥାଉ ଶଙ୍କିତ ବଦନେ
ଅବା ମ୍ଳାନ ହାସ୍ୟରେଖା ଫୁଟାଇ ଓଠରେ ।
ଆଉ କେତେ କାଳ ବୟୋବୃଦ୍ଧ ବୟୋଜ୍ୟେଷ୍ଠ
ଅବା ପ୍ରତୀକ୍ଷିତ ଇପ୍ସିତ ପୁରୁଷର ପାଶେ
ଆପଣାର ଦେହର ଦେହଳୀକୁ କରୁଥିବି
ଆକାତରେ ଅବାରିତ ଆକୁଣ୍ଠ ପ୍ରଦର୍ଶନ
ଲଭିବାକୁ ପରିଣୟ ପରିଣିତାର ସ୍ବୀକୃତି ।
ଆଉ କେତେ କାଳ ଦେଉଥିବି ମୁହିଁ ସେଇ
ଚିରାଚରିତ ଗତାନୁଗତିକ ଧାରାରେ ପରୀକ୍ଷା
ସଣ୍ଠଣା - ରାନ୍ଧଣା - ଘରକରଣାର ସଂସ୍କାର ସଂସ୍କୃତି
ଅବା କାଳେ କାଣୀ - କୁବ୍ଜୀ - ଖନୀ - ବିକଳାଙ୍ଗୀ
ହୋଇଥିବି ବୋଲି ସେଥିଲାଗି ସାମ୍ନା କରୁଥିବି
ମୌଖିକ କାୟିକ ବୌଦ୍ଧିକତାର ତୀର୍ଯ୍ୟକ ସମୀକ୍ଷା ।
ଆଉ କେତେ କାଳ ଦେଉଥିବି ଆପଣା ତନୁର
ସତୀତ୍ବ କୌମାର୍ଯ୍ୟ ବିଶୁଦ୍ଧତାର ଅଗ୍ନିପରୀକ୍ଷା
ଆକାଂକ୍ଷିତ ଚିର ପ୍ରତୀକ୍ଷିତ ମନର ମଣିଷ ପାଶରେ
ତାହାର ପାଦରେ ନିସର୍ତ୍ତ ସମର୍ପଣର ପ୍ରତିଦାନରେ
ଲଭୁଥିବି ଜୀବନ ବ୍ୟାପି ଲାଞ୍ଛନା ଯାତନାର ଉପହାର ।
