ଭୁଲିନି ତୁମକୁ

ହାତ ପାପୁଲିରେ

  ଲେଖି ତୁମ ନାଆଁ

    ଲିଭାଏ ହଜାରେ ଥର

ଡର ଲାଗେ କାଳେ

  କିଏ ଦେଖିନେବ

    ହଜିଯିବ ଖୁସି ମୋର.l

ହୃଦୟର ସେଇ

  ନିଭୃତ କୋଣରେ

    ଲେଖିଛି ଯତନ କରି

ଲାଲ ଟୁକ ଟୁକ

  ହୃଦୟର ସହ

    ଦେଇଛି ରକତେ ଭରି.l

ଆଖି ପଲକରେ

  ରଖି କେତେ ଥର

    ଲୁହରେ ଦେଇଛି ଧୋଇ

ରାତି ଆସିଗଲେ

  ସପନରେ କାଳେ 

     ତୁମ ନାଆଁ ଦେବି କହି.l

ହୃଦୟଫଳକେ

  ଆଙ୍କିଛି ଯତନେ

     ପ୍ରୀତିର ପିୟୁଷ ଭରି

ନିର୍ଜନ ନିଶିଥେ

  ଜାଳେ ଶୁଭ ଦୀପ

   ମଙ୍ଗଳ କାମନା କରି.l

ଆଖି ସିନା ବୁଝେ

   ଆଖିର ଭାଷାକୁ

     ଆନ କେ ପାରେନି ବୁଝି

ହୃଦୟର ଭାବ

  ନିବିଡ଼ ସମ୍ପର୍କ

    କେବେ ଯାଏନାହିଁ ହଜି.l

ନିଶ୍ୱାସେ ବିଶ୍ୱାସେ

  ରଖିଛି ବୋଲିତ

    ହୃଦୟ ପାରୁନି ଭୁଲି

ସଞ୍ଜ ସକାଳରେ

  ଖୋଜେ ଆଖି ମନ

     ହୃଦୟ ଦରଜା ଖୋଲି.ll