ଅକୁହା ଅଭିବ୍ୟକ୍ତି ===========

ଅକୁହା ଅଭିବ୍ୟକ୍ତି
===============
ସେମିତି ଅଛି ମୁଁ 
       ସେଇ ଦୋଛକିରେ 
           ତୁମେ ଗଲା ପରେ ପରେ 
କାଳ ବୈଶାଖୀର
       ଉତ୍ତପ୍ତ ଝାଞ୍ଜିରେ 
              ସବୁ ଦଗ୍ଧ ହେଲାପରେ l
ସ୍ମୃତି ଇଟା ସବୁ 
        ସାଇତି ରଖୁଛି 
           ଥାକ କରି ଯତନରେ 
କାଳେ ତୁମେ କେବେ 
       ମାଗିବ ହିସାବ 
            ହୃଦୟର ଆବେଗରେ l
ଅଧାଭଙ୍ଗା ସେଇ 
     ହୃଦୟ ମହଲ
          ଏବେ ବି ପଚାରେ ମତେ
ପ୍ରଶ୍ନର ଆଘାତ
     ଅଦେଖା ଅକୁହା
         କ୍ଷତାକ୍ତ ଏ ମନ କେତେ l
ଜଳୁଛି ଏବେ ବି 
      ମହାଦୀପ ସେଠି 
         ନୀରବରେ ଧିରେ ଧିରେ
ଗର୍ଭଗୃହ ମଧ୍ୟେ 
     ଶୂନଶାନ ଲାଗେ
         ଅପ୍ରାପ୍ତିର ଆବେଗରେ l
ପୂର୍ଣ୍ଣାହୁତି ପରେ 
   ଯଜ୍ଞ ବେଦୀ ନିଶ୍ୱ 
        ପାଉଁଶର ଶୁଭ୍ର ସ୍ତୁପ 
କେବେ ଲାଗେ ପ୍ରୀତି 
    ପୂଣ୍ୟ ବୈତରଣୀ 
        କେବେ ଲାଗେ ମହାପାପ l
କହିବାର ପାଇଁ 
     ଶବ୍ଦ ତ ଅନେକ 
         ଓଠରୁ ପଛକୁ ଫେରେ 
ନ କହି ହୃଦୟ 
   ଲୁହେ ଭିଜିଯାଏ 
       ଦୀର୍ଘଶ୍ୱାସ ଖାଲି ଭରେ l
ହୃଦୟ କାନ୍ଥରେ 
   ଅସ୍ପଷ୍ଟ ରଚନା 
       ରଙ୍ଗ ଲାଗେ ଫିକା ଫିକା 
କେବେ ଗୁଞ୍ଜରିତ 
    ପ୍ରୀତିର ରାଗିଣୀ 
       କେବେ ଲାଗେ ଖୁବ ଏକା l
ମାନ ଅଭିମାନ 
   ଅଭିଯୋଗ ନାହିଁ 
       ନାହିଁ ଆବେଗର ଢେଉ 
ଅକୁହା କାହାଣୀ 
    ହୃଦୟ ମହଲେ
        ସେମିତି ଗୋପନେ ଥାଉ l


ସୁଜାତା ଦାସ 
ବାଲେଶ୍ୱର