ଭୁଲ୍ ଥିଲା ମୋର

ତୁମେ ତ ମିଛ କହୁଥିଲ 

କିନ୍ତୁ ତୁମ କଥାକୁ 

ସତ ବୋଲି ଭାବିନେବା

ମୋର ହିଁ ଭୁଲ୍ ଥିଲା ।

ତୁମେ ତ କହି ନ ଥିଲ 

ମୋତେ ଭଲ ପାଉଛ ବୋଲି

ତୁମ ପ୍ରତାରଣାକୁ

ପ୍ରେମ ବୋଲି ଭାବିନେବା

ମୋର ହିଁ ଭୁଲ୍ ଥିଲା ।

ତୁମେ ତ ପାଦେ ପାଦେ

ଚେତେଇ ଦେଇଥିଲ 

ମୋତେ ସ୍ଵୀକାର କରିପାରିବନି ବୋଲି

ତଥାପି ତୁମର ସବୁ ମିଛ ଭିତରେ

ଏଇ ଗୋଟେ ସତକୁ

ନ ଠଉରାଇପାରିବା

ମୋର ହିଁ ଭୁଲ୍ ଥିଲା ।

ତୁମେ ତ ବାରମ୍ବାର 

ମୋ ଅସ୍ମିତା ଉପରେ

ଆଣିଥିଲ ପ୍ରଶ୍ନବାଚୀ 

କିନ୍ତୁ ପ୍ରତି ଥର

ତୁମକୁ କ୍ଷମା କରିଦେବା

ମୋର ହିଁ ଭୁଲ୍ ଥିଲା ।

ସେ ସବୁ ଭୁଲ୍ ଭିତରେ

ଲୁଚି ରହିଥିଲା 

ମୋର ଟିକେ ବିଶ୍ଵାସ 

କାଣିଚାଏ ସ୍ଵପ୍ନ

ଆଉ ମଧୁର ମୃଦୁହାସ୍ୟ

ସେ ସବୁକୁ ବି ଶେଷରେ

ତୁମ ପାଦ ତଳେ 

ସମର୍ପି ଦେବା

ମୋର ଆଉ ଏକ ଭୁଲ୍ ଥିଲା ।