ଭକ୍ତି ହିଁ ଶକ୍ତି

ଭାବର ଠାକୁର ନାଥ ଜଗତର

   କି ଭାବେ ହେବି ତୋହର

ନାହିଁ ଜ୍ଞାନ ମୋର କର୍ମ ମହାନର

   ଜାଣେନି ତପ ଧ୍ୟାନର ll

ଅନ୍ତର ବେଦନା ମନର ଭାବନା

   ପ୍ରକାଶ କରଇ ମୁଇଁ

ଧନ୍ୟବାଦ ପ୍ରଭୁ ତୁମେ ମହାପ୍ରଭୁ

    ମଣିଷ ଜନମ ଦେଇ ll

ଚିନ୍ତେ କଳ୍ପନାରେ  ମନ ହୃଦୟରେ

    ସୃଷ୍ଟିର କରତା ଗାଥା

ସର୍ବ ଶକ୍ତିମାନ ସର୍ବ ବିଦ୍ୟମାନ

    ବୁଝିକି ନୁଆଁଏ ମଥା ll

ଜ୍ଞାନ ବିଜ୍ଞାନରେ  ଧର୍ମ ପାଣ୍ଡିତ୍ୟରେ

   ଜାଣିବା ସହଜ ନୁହେଁ

ତର୍କ ବିତର୍କରେ  ଅନ୍ଧ ବିଶ୍ୱାସରେ

   ସାନ୍ନିଧ୍ୟ ସମ୍ଭବ ନୁହେଁ ll

ମହାକର୍ଷଣୀୟ  ଅଦ୍ଭୁତ ନିୟମ

   ନାହିଁ ଡୋର ଘୂରେ ମହୀ

ଅଦୃଶ୍ୟ ଶକ୍ତିର ପ୍ରଭୁଯେ ଆଧାର

   ଭକ୍ତିର ତୁଳନା ନାହିଁ ll

ଭକ୍ତି ଅଟେ ଶକ୍ତି ଭକ୍ତି ଅଟେ ଗତି 

    ଭକ୍ତି ବିନା ନାହିଁ ଶାନ୍ତି

ଭକ୍ତି ପାଇଁ ମୈତ୍ରୀ ଭକ୍ତି ବାନ୍ଧେ ପ୍ରୀତି

    ଭକ୍ତି ବଳେ ଶିବ ପ୍ରାପ୍ତି ll

ଭକ୍ତି କରି ଭକ୍ତ ପାଏ ଆଶୀର୍ବାଦ

    ଆତ୍ମ ନିବେଦନ ଭକ୍ତି

ଭାବର ଠାକୁର ଭକ୍ତକୁ ନିଜର

    ଭକ୍ତିରେ ଦିଅନ୍ତି ମୁକ୍ତି ll