Library
Profile
ଭାରି ହୁନ୍ଦର ସେ ଜାଣେ
ଭାରି ହୁନ୍ଦର ସେ ଜାଣେ
ବନ୍ଧୁ ଭାବେ ତାକୁ ଭାବରେ ଡାକିଲେ
ସିଏ ବି ଆପଣା ମଣେ ,
କିଏ ସାନ, ବଡ଼-ଧନୀ କି ଗରିବ
ଏ କଥା ମନେ ନ ଆଣେ ...
ଭାରି ହୁନ୍ଦର ସେ ଜାଣେ ;
କେ ମାଗିବା ଆଗୁ ,ଯାଚି ଦିଏ ସବୁ
କା' ପାଶୁ ଛଡ଼ାଇ ଆଣେ ।(୦)
ବାଲ୍ୟ ସଖା ବୋଲି ସୁଦାମାକୁ ସେ ତ
ସବୁକିଛି ଯାଚି ଦେଲା ,
ବିଦୁରର ଘରେ ଶାଗ ଭାତ ଖାଇ
ଭାବରେ ବିହ୍ଵଳ ହେଲା।
ଶବରୀଠୁଁ ଖାଇ ଅଇଁଠା କୋଳି ସେ
ଯାଚି ଦେଲା ସ୍ୱର୍ଗ ସୁଖ ,
ଦେବକୀ,ଯଶୋଦା ପୁତ୍ରପଣେ ପାଇ
ପାସୋରିଲେ ସବୁ ଦୁଃଖ ।
ବନ୍ଧୁ ମହାନ୍ତିକୁ ଭୋଗ ଯାଚି ଦେଇ
ଧରାଇଲା ଚୋର ପଣେ ।(୧)
ଭାରି ହୁନ୍ଦର ସେ ଜାଣେ ;
କେ ମାଗିବା ଆଗୁ ,ଯାଚି ଦିଏ ସବୁ
କା' ପାଶୁ ଛଡ଼ାଇ ଆଣେ ।
ସାଲବେଗ ଡାକ ଶୁଣି ବହୁଦୂରୁ
ଅଟକାଇ ଦେଲା ରଥ ,
ଆଉ କାହା ଲାଗି,ସାକ୍ଷୀ ଦେବାପାଇଁ
ହେଲା ସାକ୍ଷୀ ଗୋପୀନାଥ ।
ପାନେ ପାଇଲାରୁ-ଗୀତା ପଣ୍ଡାଙ୍କୁ ସେ
ଭାର ବୋହି ନେଇ ଦେଲା ,
ଏଡ଼େ ଲୋଭୀ ପୁଣି ଦାସିଆ ବାଉରୀ
ନଡ଼ିଆ ଛଡ଼ାଇ ନେଲା ।
ହେଲେ ମୋତେ କିଆଁ ଆଡ଼ ନୟନରେ
ଚାହେଁନାହିଁ ପର ମଣେ ।(୨)
ଭାରି ହୁନ୍ଦର ସେ ଜାଣେ ;
କେ ମାଗିବା ଆଗୁ ,ଯାଚି ଦିଏ ସବୁ
କା' ପାଶୁ ଛଡ଼ାଇ ଆଣେ ।
ବନ୍ଧୁ ଭାବେ ତାକୁ ଭାବରେ ଡାକିଲେ
ସିଏ ବି ଆପଣା ମଣେ ,
କିଏ ସାନ, ବଡ଼-ଧନୀ କି ଗରିବ
ଏ କଥା ମନେ ନ ଆଣେ ।।
ବି. ନିରୁପମା
ମାମୁରିଆ, ଛେଣ୍ଡିପଦା,ଅନୁଗୋଳ।
