ଭାଙ୍ଗିଗଲା ଯୌଥ ପରିବାର
ଭାଙ୍ଗିଗଲା ଯୌଥ ପରିବାର
ବାବୁ ସ୍ୱପ୍ନେଶ୍ଵର ମଧୁପୁର ଜମିଦାର
ଭାଇ ବିଶ୍ୱେଶ୍ୱର ଅନୁଗତ ନିରାଧାର |
ପୈତୃକ ସମ୍ପତ୍ତି ତାଙ୍କ ଚାଳିଶ ଏକର
ଧନ ମାନ ଯଶ ସଙ୍ଗେ ନ୍ୟାୟ ମୂର୍ତ୍ତିଧର |
ଏକାନ୍ନବର୍ତ୍ତୀ ଯଉଥ ପରିବାର ଭାର
ବନ୍ଧୁ ବାନ୍ଧବ ସହିତ ଗ୍ରାମ କର୍ଣ୍ଣଧାର |
ପରିବାର ଲୋକ ସଂଖ୍ୟା ଥିଲାଟି ସତର
ଦୁଇ ଭାଇ ଭଗ୍ନୀଚାରି ମାତା ସହିତର |
ପିତା ଦିବଂଗତ ତାଙ୍କ ବିଧବା ପିଉସୀ
ବେନି ସୁତା ସୁତ ସହ ଅଥର୍ବ ମାଉସୀ |
ବେଣୁଧର ପରିଚାର ପତ୍ନୀ ସହିତର
ନିଜ ପତ୍ନୀ ପୁତ୍ର ପୁତ୍ରୀ ମିଶାଇ ସତର |
ସୀତାକୁ ବିମଳା ଦୁଇ ଭଗ୍ନୀ ସମ ଯାଆ
ଗୁଣବତୀ ଦୟାବତୀ ଭାବେ ଥିଲା ନାଆଁ |
ବେନି ପୁତ୍ର ଏକ ସୁତା ସ୍ୱପ୍ନେଶ୍ଵରଙ୍କର
ପାଠ ପଢ଼ି ଦୁହେଁ ହେଲେ ବିଦେଶେ ଡାକ୍ତର |
ସୁତା ଶୈଳବାଳା ହାଇସ୍କୁଲେ ଶିକ୍ଷୟିତ୍ରୀ
ବିଭାହେଲେ କଲେଜ ଅଧ୍ୟକ୍ଷେ ଯଥାରୀତି |
ପୁତୁରା ବ୍ରଜେଶ କିନ୍ତୁ ଅତି ଅମାନିଆ
ଦୁଷ୍ଟାମିର ଶେଷ ସୀମା ସଭିଏଁ ଛାନିଆ |
ବଡ଼ବାପାଙ୍କୁ ଡରି ସେ ପଢିବାକୁ ଯାଏ
ଗର୍ବ ଅଭିମାନେ କାରେ ଖାତିର ନଥାଏ |
ଖର୍ଚ୍ଚ କରେ ଅପର୍ଯ୍ୟାପ୍ତ ବସଇ ଛକରେ
ପାନବିଡି ମଦ ଜୁଆ ଝିଅଙ୍କ ଚକ୍କରେ |
କୁସଙ୍ଗରେ ପଡ଼ି ପାଠ ଅଧାରୁ ଛାଡିଲା
ଆଳସ୍ୟ ନିଶା କବଳେ ସେ ବୁଡ଼ି ରହିଲା |
ଝିଅ ଚାରି ହୀରା ମୋତି ରୂପାଲି ମାଣିକ
ପାଠ ପଢ଼ି ଚାକିରୀ କରିଲେ ପ୍ରାମାଣିକ |
ପିଉସୀ ପୁଅ ସୁମନ ଅମନ ସେନାରେ
ଯୋଗଦେଲେ ବ୍ରଜ ରହେ ମିଛ ବାହାନାରେ |
ସବୁ ପୁଅ ଝିଅଙ୍କର ବିବାହ ସରିଲା
ଧିରେ ପରିବାର ବୋଝ ହାଲୁକା ଧରିଲା |
ସାନ ଭାଇ ବିଶ୍ୱେଶ୍ୱର ଦୁର୍ଘଟଣାଗ୍ରସ୍ତ
ଘଟଣା ସ୍ଥଳରେ ହେଲେ ପରଲୋକ ଗତ |
ବିମଳା ପର କଥାରେ ହୋଇ ପ୍ରଭାବିତ
ବଡ଼ବାପା ବିରୁଦ୍ଧେ ପୁତ୍ରକୁ ନିୟୋଜିତ |
ବ୍ୟବସାୟ କରିବାକୁ ଟଙ୍କା ମାଗେ ଯାଇ
ଦୁଇ ଲକ୍ଷ ଦେଲେ ବାପା ହାତରେ ଧରାଇ |
ଦୋକାନରେ କ୍ଷତି ହେଲା ମୂଳ ଗଲା ବୁଡ଼ି
ପୁଣି ଦୁଇ ଲକ୍ଷ ଦେଲେ ଜାଣି ପଥ ହୁଡ଼ି |
ବ୍ୟବସାୟରେ ବ୍ରଜେଶ ନିରାଶ ହୋଇଲା
ପୁଣି ବଡ଼ବାପା ପାଖେ ହାତ ପତାଇଲା |
ନାହିଁ କରନ୍ତେ ତକ୍ଷଣେ ହୋଇ କ୍ରୋଧୋନ୍ମତ୍ତ
କଟୁ ତିରସ୍କାର ମାଡ଼ ଦେବାକୁ ଉଦ୍ୟତ |
ଆକସ୍ମିକ ବଜ୍ରପାତ ଘୁରିଗଲା ମଥା
ପୁତୁରାର ଆଚରଣ ଆଚମ୍ବିତ କଥା |
ମାଆ ପୁଅ ଏକାକାର ଅଦ୍ଭୁତ ଦୁନିଆ
ଭାବି ଜମିଦାର ବାବୁ ହୋଇଲେ ଛାନିଆ |
କୋହ ଚାପି ବୁଝାଇଲେ ଶୁଣ ବାପଧନ
ସବୁତ ତୋହର କିମ୍ପା କରିବି ବଣ୍ଟନ |
ତୋ ପ୍ରତି ଦରଦ ଅଛି ସବୁରି ଅନ୍ତର
ସବୁ ନିଅ ସ୍ଥାବର ଆବର ଅସ୍ଥାବର |
ମୁଁ ଜୀବନେ ଥିଲାଯାଏ ହେବନାହିଁ ବାଣ୍ଟ
ଶୁଣିକହେ ବୁଢ଼ା ତୋର ଭାଙ୍ଗିଦେବି ଆଣ୍ଟ |
ଅନ୍ଧ ଧୃତରାଷ୍ଟ୍ର ନିତି ଚଳିବନି ଆଉ
ବାଣ୍ଟ ସବୁ ଆଜି ତୁମେ ବଞ୍ଚି ଥାଉ ଥାଉ |
ଧର୍ମ କାନ୍ଦେ ସବୁ ତ୍ୟାଗ ଆଜି ପାଣି ଗାର
ଭାଙ୍ଗିଗଲା ମୁହୂର୍ତ୍ତକେ ଯୌଥ ପରିବାର |
ଅମୃତରେ ଵିଷ ଦେଲା ବ୍ରଜ କୁଳାଙ୍ଗାର
ପୁତ୍ର ପୁତ୍ରୀମାନେ କଲେ ତାହାକୁ ଧିକ୍କାର |