ଭାବର ଠାକୁର

ଭାବର ତୁମେ ଠାକୁର   ଛଳନାଠୁ ବହୁ ଦୂର

     ବିଶ୍ୱାସେ ଆଶିଷ ପାଏ ଭକ୍ତ ତୁମର

ଅହଂଭାବ ପରିହର   ଯୁକ୍ତିତର୍କ ଅଭାବର

   ସମର୍ପିତ ହେଲେ ମିଳେ କରୁଣା ତୋର

        ଜଗବନ୍ଧୁ କରୁଣାକର

    ଭକ୍ତିରେ ଶୁଣନ୍ତି ପ୍ରଭୁ ଭକ୍ତ ଗୁହାର l

ଜଗନ୍ନାଥ ରଘୁବୀର   ଭାବଗ୍ରାହୀ ବଂଶୀଧର

      ଅନାଦି ଅନନ୍ତ ପ୍ରଭୁ ସେ ନିରାକାର

ସକଳ କର୍ତ୍ତା ସୃଷ୍ଟିର    ପ୍ରଭୁଯେ  ପରମେଶ୍ୱର

      ସର୍ବବ୍ୟାପି ପରଂବ୍ରହ୍ମ ଜଗଦ୍ଦିଶ୍ୱର

       ଶ୍ରୀହରି ଦୟାର ଠାକୁର

    ଭାବରେ ପଡନ୍ତି ବନ୍ଧା ସେ ମାୟାଧର l

ସଂକଟରୁ ରକ୍ଷାକର    ଶୁଣିକି ଗଜ ଚିତ୍କାର

     ଚକ୍ରେ ଛେଦ ଶିର କଲ ଦୁଷ୍ଟ କୁମ୍ଭୀର

ସମର୍ପିତ ଦ୍ରୋପଦୀର   ଶୁଣି କ୍ରନ୍ଦନ ତାହାର

      କୋଟି ବସ୍ତ୍ର ଦେଇ ତାକୁ ରଖ ମାନର

      ଅନ୍ତର୍ଯ୍ୟାମୀ ଦେବ ଈଶ୍ୱର

      ବିପଦ ତାରନ୍ତି ପ୍ରଭୁ ସେ ଚକ୍ରଧର l

  

ଜାଣି ଭାବ ଦାସିଆର     ଗ୍ରହଣ ନଡ଼ିଆ କର

      ହୃଦୟେ ସର୍ବଦା ରଖ ମନ ଭକ୍ତର

ଶୁଣିକି ସାଲବେଗର    ଆକୁଳ ପ୍ରାର୍ଥନା ତାର

     ନନ୍ଦିଘୋଷ ରଥ ରହେ ଦର୍ଶନେ ତାର

       ବାଲିରଥେ ରହି ଠାକୁର

      ବଳରାମ ଦାସ ପାଏ ତା ସମ୍ମାନର l

କାଳିଆ କଳା ଠାକୁର   ନୀଳାଚଳେ ନୀଳା କର

      ଜଗତ ଜନଙ୍କ ନାଥ ମୁରଲୀଧର

କୃପାସିନ୍ଧୁ କୃପାକର    ପତିତ ଜନ ଉଦ୍ଧାର

      ଦୟା କ୍ଷମା ସତ୍ୟ ଶାନ୍ତି କର ବିସ୍ତାର

      ପ୍ରଭୁଯେ ଭାବର ଠାକୁର

  ତୁମ୍ଭ ପାଦତଳେ ମୋର ଯେ ନମସ୍କାରll