ବଦଳେ ସମୟ ଚକ୍ର

ଲୁଚାଇବି ନାହିଁ କିଛି ମୁଁ ତୁମକୁ

କହିବି ହୃଦୟ ଖୋଲି

ଲାଗିପାରେ ପ୍ରିୟ ଅଥବା ଅପ୍ରିୟ

କଥା ଅକାରଣ ବୋଲି ।

ହସଖୁସି ସୁଖ ଆନନ୍ଦ ସମୟେ

ଅଭାବ ହୁଏନି ସାଥି

ଯେତେ ମିଥ୍ଯାବନ୍ଧୁ ଦୁଃଖ ଦୁର୍ବିପାକେ

ମୁହଁକୁ ଲୁଚାଇଥାନ୍ତି ।

ନକର ଭରସା ଅପେକ୍ଷା ଉପେକ୍ଷା

ଜୀବନ ସରଳ ସୂତ୍ର

ପ୍ରସନ୍ନତା ପାଇଁ କୁହ ସତ୍ଯ ପ୍ରିୟ

କଥା ସଦା ସୁମଧୁର ।

ଦାନ ଦୟା କ୍ଷମା ସ୍ନେହ ଓ କରୁଣା

ହୃଦୟେ ଭରି ସଯତ୍ନେ

କରିବା ଉଚିତ ନିଜ ସୁକର୍ତ୍ତବ୍ଯ 

ମାନବ ମାତ୍ର ଜୀବନେ ।

ହୃଦୟର ବ୍ଯଥା ଗୁମର କଥାକୁ

ଅନ୍ତରରେ ରଖି ଚାପି

ଲୁଚାଇବା ଭଲ ଆଖିର ଲୁହକୁ

ସନ୍ତର୍ପଣେ ନିଜେ ପୋଛି ।

ଖେଳାଇବା ମୁହେଁ ସଦା ସ୍ମିତହାସ 

ଭରିବା ମନେ ସାହସ

ବ୍ଯବହାରେ ଆମ ଦୁନିଆଁରେ କେହି

ନପାଉ କଷ୍ଟ ଉଦ୍ଦେଶ୍ଯ ।

ଯଦି ତୁମେ ନିଜେ ଚାହୁଁଛ ମଙ୍ଗଳ 

କରୁଛ ପରୋପକାର 

ମିଳିପାରେ ଦୁଃଖ ଜୀବନରେ ବାଧା

ଅପନିନ୍ଦା ତିରସ୍କାର ।

ସ୍ଥିତି ପ୍ରତିକୂଳ ହୁଏ ଅନୁକୂଳ 

ବଦଳେ ସମୟ ଚକ୍ର 

ଲଭେ ଧୈର୍ଯ୍ୟବାନ କର୍ମର ସୁଫଳ

ଅଭିଜ୍ଞ ହୁଏ ସୁପାତ୍ର ।