ବାଣୀ ଆବାହନ

ନମୋସ୍ତେ ବୀଣା ଧାରିଣୀ

ମାତ ବୀଣାପାଣି

ଶ୍ୱେତ ପଦ୍ମାସନା ସ୍ଥିତା

ବିଷ୍ଣୁ ପାଟରାଣୀ

ଭଗବତୀ ସରସ୍ବତୀ,

ସୁରାସୁର ନାଗ ନର

ପାଦେ କରି ସ୍ତୁତି l

ଚଞ୍ଚଳ ନୟନ ମାଗୋ

କଜ୍ଜଳେ ଉଜ୍ଜଳ

ଗଳାରେ ଶୋଭିତ ହେମ

ମଣି ମୁକ୍ତା ମାଳ

କର୍ଣ୍ଣେ କନକ କୁଣ୍ଡଳ,

ଚଂଚଳା ଚମକ ଜିଣି

ଆନନ ମଣ୍ଡଳ l

ଲେଖନୀ ପୁସ୍ତକ ବେନି

କରେ ଶୋଭାବନ

ତରୁଣ ତରଣୀ ଜିଣି

କିରୀଟି କିରଣ

ପରିହିତା ଶ୍ୱେତ ବସ୍ତ୍ର,

ବାଣୀ ନାରାୟଣୀ ବାକ୍ୟ-

ଦେବୀ ଆଦିମାତ l

କିଂଚିତରେ ଅନୁଗ୍ରହ

ହୋଇଲେ ଜନନୀ

ମହାମୂର୍ଖ ଅନର୍ଗଳ

ପାରଇ ବଖାଣୀ

ବାକ୍ୟଦେବୀ ବିଦ୍ୟାଦାତ୍ରୀ,

ଗଳାରେ ଖେଳାଅ ପଦ

ବସି ମା ଭାରତୀ l

ନମୋ ପଙ୍କଜ ବାସିନୀ

ପଙ୍କଜ ପୟର

ଦିଅ ମା ଅଭୟ ଦୀନ

ହୀନ ତୋ କୋୟର

ଗୀତେ ପ୍ରେମାନନ୍ଦ ଭାଷ,

ଦୟାମୟୀ ପୂର୍ଣ୍ଣକର

ମୋର ଅଭିଳାଷ ।