ଶକ୍ତିଶାଳୀ କଲମ

      

କଲମଟି ଶକ୍ତିଶାଳୀ ବଲମ ଠୁଁ ବନ୍ଧୁ l

କଲମରେ ଜଗାଇଲା ଓଡ଼ିଆଙ୍କୁ ମଧୁ ll

କଲମରେ ଗାରକାଟି ଗୋପବନ୍ଧୁ ଦାସ l

ଦେଶପ୍ରେମୀ ଦେଶଭକ୍ତ କରିଗଲା ଚାଷ ll

କଲମ ଧରିଲେ ବାବୁ ଫକୀର ମୋହନ l

ଭାଷା ରକ୍ଷାହେଲା ତେଜି ଭାଷାଆନ୍ଦୋଳନ ll

କବିତା ଲେଖି ଜାତୀୟ କବି ବାଞ୍ଛାନିଧି l

ଇରମରେ ବହିଗଲା ରକତର ନଦୀ ll

ବୀରକିଶୋର ଦାସଙ୍କ ବିଦ୍ରୋହୀ ସଙ୍ଗୀତ l

ବିଦ୍ରୋହ ନିଆଁ ଜଳିଲା ସ୍ଫୁଲିଙ୍ଗେ ଇଙ୍ଗିତ ll

କାନ୍ତ କବିଙ୍କର ବନ୍ଦେ ଉତ୍କଳ ଜନନୀ l

ଜାଗରଣ ଜଗାଇଲା ଉତ୍କଳରେ ପୁଣି ll

ବଙ୍କିମ ଲେଖିଲେ ଗୀତ ବନ୍ଦେ ମାତରମ l

କ୍ରାନ୍ତି ଗୀତରେ ବିପ୍ଳବୀ ରକତ ଗରମ ll

ସାରେ ଯହାଁସେ ଅଚ୍ଛା ଲେଖିଲେ ଇକବଲ l

ବିଦ୍ରୋହୀ ତାତି ବିଦେଶୀ ହେଲେ କଲବଲ ll

କବିନ୍ଦ୍ର ରବୀନ୍ଦ୍ରଙ୍କର ଜାତୀୟ ସଙ୍ଗୀତ l

ଏକ ସୂତ୍ରେ ଦେଶ ବାସୀ ଏକତ୍ର ଗ୍ରଥିତ ll

କଲମରେ ସୃଷ୍ଟି କେତେ ସୁନ୍ଦର ସାହିତ୍ୟ l

ପାଠ କରି ଜନ ମନ ହୁଏ ହରଷିତ ll

କଲମେ ହୋଇଛି ସର୍ବ ବିଦ୍ୟା ସଂରକ୍ଷଣ l

ସାଧନ କରିବାକୁ ସେ ମାନବ କଲ୍ୟାଣ ll

ଲେଖନୀ ମୁନେ ଲିଖିତ ଶାସ୍ତ୍ର ଓ ପୁରାଣ l

ସକଳ ହୃଦେ ବସନ୍ତି ସ୍ୱୟଂ ନାରାୟଣ ll

କଲମର ଶକ୍ତି କେହୁ ପାରେ କି ବଖାଣି l

ଆଶ୍ଚର୍ଯ୍ୟ ଏ ଅସ୍ତ୍ର ଭାଈ କିଏ ତା ବିନ୍ଧାଣି?

ଏ ଅସ୍ତ୍ର ଧରାଇଛନ୍ତି ଗୁରୁ ଶ୍ରୀ ଗୋବିନ୍ଦ l

ଭକ୍ତିଭରେ ନମେ ତାଙ୍କ ଶ୍ରୀପଦାରବିନ୍ଦ ll