ବାହାଘର କଲା ପର

ସବାରୀ ଉଠିଲା ତୋର ଯିବୁ ଶାଶୁଘର

ବିଧିର ବିଧାନ ତୋତେ କରିଦେଲା ପର 

ଅଲିଅଳି ଝିଅ ଥିଲୁ ତୁ ମୋହର

ତୋର ବିନା ସବୁ ଦିଶିବ ଅନ୍ଧାର

ତୁ ଚାଲିଯିବୁ, ମୁଁ ପର ହେବି

କେମିତି ବଞ୍ଚିବି କହ ଝିଅ ମୋର ।୧।

ସିନ୍ଦୂର ଟୋପାଏ ତୋତେ ନେଉଛି ଦୂରକୁ

ବୁଝେଇ ପାରୁନି ଆଜି ମୋହର ମନକୁ

ଝିଅ ନ ଥିଲୁ ତୁ ଥିଲୁ ମୋର ମାଆ

ବାଧକ ବେଳରେ ହେଉଥିଲୁ ସାହା

ତୁ କାନ୍ଦୁଥିବୁ, ମୁଁ ଝୁରି ହେବି

କେମିତି କାଟିବି ଦିନ ଝିଅ ମୋର ।୨।

ମନେପଡେ ପିଲାଦିନେ ଥିଲୁ ଅଝଟିଆ

ଟିକେ ଟିକେ କଥାରେ ତୁ ହେଉ ଅମାନିଆ

ପାଠ ପଢୁଥିଲୁ ଘରକାମକୁ ଭୁଲି

ଆଜି ଯାଉ ଶାଶୁଘର ବାପାକୁ ଭୁଲି

ତୁ ଭାବୁଥିବୁ, ମୁଁ ଚାହିଁଥିବି

କେବେ ତୁ ଆସିବୁ ଫେରି ଆମ ଘର ।୩।

ହୃଦୟ ଫଟାଇ ମାଆ କାନ୍ଦିବ ବାହୁନି

କେମିତି ବୁଝାଇଦେବି ଭାବି ମୁଁ ପାରୁନି

ଶାଶୁଘର ଗଞ୍ଜଣା କେମିତି ସହିବୁ

ସ୍ୱାମୀ ଶାଶୁ ନେଇ ତୁ କେମିତି ଚଳିବୁ

ତୁ ସଢୁଥିବୁ, ମୁଁ ଘାରୁଥିବି

ଅଥୟ ହେଉଛି ହୃଦୟ ମୋ'ର ।