ଅତର ବୋଳା ସେ ପତର ଭିତରେ

     

ଅତର ବୋଳା ସେ ପତର ଭିତରେ

କେତେ ଯେ ଭରିଛ ତାତି

ଯେତେ ପଢୁଥିଲେ ସେତେ ଶୋଷ ବଢେ

ପଢିବା ହୁଏନି ଇତି।୦ା

ଆଗରୁ ତ କାହିଁ ଏମିତିକା ଚିଠି

କେବେ ବି ନ ଥିଲ ଲେଖି

ଏତେ କଥା ସବୁ କେମିତି ଲେଖିଲ

ସଜଳ କରୁଛି ଆଖି

ଅକ୍ଷରେ ଅକ୍ଷରେ ଅଜାଡି ଦେଇଛ

ମନ ତଳ ପ୍ରୀତି ଗୀତି।

ଅତର ବୋଳା ସେ ପତର ଭିତରେ

କେତେ ଯେ ଭରିଛ ତାତି।୧ା

ପାନ ପତରରେ ତୀର ମାରି ତୁମେ

ଚିଠି ଦେଇଅଛ ଲେଖି

ପହିଲି ଦେଖାରେ ତୁମ ପାଶେ ଏହି

ପରାଣ ଦେଇଛି ବିକି

ପୀୟୂଷ ପଖଳା ପଦିଏ କଥାରେ

କିଣିନେଲ ମୋର ମତି।

ଅତର ବୋଳା ସେ ପତର ଭିତରେ

କେତେ ଯେ ଭରିଛ ତାତି।୨ା

ତୁମେ ଆକାଶରେ ମୁହିଁ ଚିଲିକାରେ

ତଥାପି ବାନ୍ଧିଛି ଆଶା

ଏକ ହୋଇ ଦିନେ ଏ ଧରା ବୁକୁରେ

ଗଢିବା ଗୋଟିଏ ବସା

ତୁମ ପ୍ରେମ ନଈ ଗଭୀର ଜଳରେ

ପହଁରିବି ନିତି ନିତି।

ଅତର ବୋଳା ସେ ପତର ଭିତରେ

କେତେ ଯେ ଭରିଛ ତାତି।୩ା