ସ୍ମୃତି

          

ସ୍ମୃତି ହୁଏ ନାହିଁ ଫିଙ୍ଗି

ଯେତେ ଟିକି ଟିକି କରିଦେଲେ ସିଏ

ମନ ଆଇନାକୁ ଭାଙ୍ଗି।୦ା

କଣ୍ଢେଇ ଖେଳରୁ କଇଁ ସରୋବର

କୁଆଁର ବଉଳବେଣି

ସୋରିଷିଆ ଖରା, ଗୋଧୂଳି ବଇଁଶୀ

ହୁକେ ହୋ, ଚିରଗୁଣୀ

କେନ୍ଦରାର କୁଉଁ, ଶଗଡର କେଏଁ

ତାଳ, ତମାାଳ, ନାରଙ୍ଗି।

ସ୍ମୃତି ହୁଏ ନାହିଁ ଫିଙ୍ଗି ......।୧ା

ଶିଶିର ପାଉଁଜି ପିନ୍ଧା ଧାନକ୍ଷେତ

ଅଗଣାରେ ଲକ୍ଷ୍ମୀପାଦ

ତୋଟା ନଈଧାରେ ସଞ୍ଜୁଆ ପବନ

ମନ୍ଦିରର ଘଣ୍ଟନାଦ

ସମୟ ସୁଅରେ ଖେଳନା ପରାଏ

ଏ ଜୀବନ ହୁଲିଡଙ୍ଗି।

ସ୍ମୃତି ହୁଏ ନାହିଁ ଫିଙ୍ଗି ....।୨ା

ଦରୋଟି ଅଝଟ, ଉଦ୍ଦାମ ଷୋହଳ 

ଯଉବନ ମତୁଆଲା

ଶରତର ହସ ଶିରାବଣ ଲୁହ

ଫଗୁଣର ଫଗୁଡାଲା

ଚାଉଳ ଆଞ୍ଜୁଳେ ହୁକୁମଧାବ ଲୋ

ହରିନିଏ ସାଥୀ, ସଙ୍ଗୀ।

ସ୍ମୃତି ହୁଏ ନାହିଁ ଫିଙ୍ଗି .....।୩ା