ହସ ଦିବସ

ମେ ମାସର ପ୍ରଥମ ରବିବାରଟି

    ଅଟଇ ହସ ଦିବସ

ଉଣେଇଶ ଅଠାନବେ ମସିହାରୁ

   ପାଳୁଛି ଏହାକୁ ବିଶ୍ୱ ।

ଡକ୍ଟର ମଦନ କଟାରିଆ ଙ୍କର

    ନେତୃତ୍ୱେ ମୁମ୍ବାଇ ଠାରେ

ପ୍ରଥମେ ପାଳିତ ହେଲା ଜାତି, ଧର୍ମ

    ବର୍ଣ୍ଣର ନିର୍ବିଶେଷରେ ।

ହସ ଯୋଗ ଆନ୍ଦୋଳନ କଟାରିଆ

   କରିଥିଲେ ଯେ ଆରମ୍ଭ

ହସିଲେ ଶରୀର ସୁସ୍ଥ ରହେ ଜାଣ

    ଦୂର ହୋଇଯାଏ ରୋଗ ।

ଦୀର୍ଘ ଜୀବନର ରହସ୍ୟ ଯେ ହସ

   ଜାଣିଛି ଯେଉଁ ମନୁଷ୍ୟ

ତା ମୁଖରୁ ଛୁଟେ ହସର ଜୁଆର

   ହୁଏନି କେବେ ଉଦାସ ।

ଯନ୍ତ୍ରଣାକୁ ହ୍ରାସ କରି ଥାଏ ହସ

   ବୃଦ୍ଧି କରେ ମନୋବଳ

ରକ୍ତ ସଂଚାଳନକୁ ସୁଗମ କରେ

    ଶରୀର ରଖେ ଚଞ୍ଚଳ ।

ରୋଗ ପ୍ରତିରୋଧକାରି ଶକ୍ତି ପୁଣି

    ମିଳିଥାଏ ହସ ଠାରୁ

ଉଦାସୀନତା କୁ ଦୂର କରିଥାଏ

    ଚିନ୍ତା ଦୁରାଏ ମନରୁ ।

ହସିକରି ପଦେ କଥା କହିଦେଲେ

   ଶତ୍ରୁ, ମିତ୍ର ହୋଇଯାଏ

ସବୁଠାରୁ ଶ୍ରେଷ୍ଠ ଔଷଧ ଯେ ହସ

    ସର୍ବ ରୋଗ ଦୂର ହୁଏ ।

ଦୂରରୁ ବନ୍ଧୁଙ୍କୁ ସ୍ୱାଗତ କରନ୍ତି

   ମୁହଁରେ ହସ ଫୁଟାଇ

ହସ ମୁହଁ ଦେଖିଦେଲେ ବନ୍ଧୁଙ୍କର 

   ମନରେ ଶାନ୍ତି ଆସଇ ।

କିଏ କେତେଦିନ ରହିବ ମହୀରେ

   ସେ କଥା ହେବନି କହି

ଯେତେଦିନ ବଞ୍ଚିଥିବା ଦୁନିଆଁ ରେ

    ଆନନ୍ଦରେ ଥିବା ରହି ।

ହସ, ଖୁସି, ସ୍ନେହ, ଶ୍ରଦ୍ଧା ଘର ଟିଏ

    ଅଟଇ ସରଗ ପୁର

ସେହିଘର ରେ ଯେ ଶାନ୍ତି ବିରାଜଇ

   ରହନ୍ତି ପରମେଶ୍ୱର ।

ହସ ପସରାରୁ ପ୍ରେମ ପ୍ରୀତି ଧାରା

    ବାଣ୍ଟିଯାଆ ଧରିତ୍ରୀରେ

ସମସ୍ତଙ୍କୁ ମୋର ଏହି ଅନୁରୋଧ

    ଆଜି ହସ ଦିବସରେ ।