ଅପେକ୍ଷା

ଅପେକ୍ଷା ଏଭରେଷ୍ଟ ପରି

ଯାହାର ଶୃଂଗ ଯଦିଓ ଥାଏ

ତାହା ଥାଏ ସୀମା ହୀନ ଅକାଶର ଛାତି ଭିତରେ

ଅପେକ୍ଷା ସେ ବଣଜଙ୍ଗଲ ଭିତରେ

ଲୁଚି ଛପି ଚାଲିଯାଉଥିବା ପାଦଚଲା ରାସ୍ତାଟିଏ 

ଯାହାର ଆରମ୍ଭ ତ ଅଛି କିନ୍ତୁ ଶେଷର ଶେଷ ହିଁ ନାହିଁ

କେବଳ ଲମ୍ବି ଚାଲି ଥାଏ

ଜଙ୍ଗଲରେ ହଜିବା ପର୍ଯ୍ୟନ୍ତ ..

ଅପେକ୍ଷା ଏଠି ବଡ ଯନ୍ତ୍ରଣା

ଉଦୁଉଦିଆ ଖରାବେଳ ପରି  

ଅପେକ୍ଷା ଏଠି ବଡ ଅସହ୍ୟ 

କଟୁନଥିବା ରାତି ପରି ..

ଅପେକ୍ଷା ଏଠି ବଡ ଭୟଙ୍କର

ଛାତି ପରେ ବସିଥିବା କେଉଁ ଅଦୃଶ୍ୟ ଶକ୍ତି ପରି

ଅପେକ୍ଷା ଏଠି ବିକ୍ରମ ପିଠିରେ 

ଓହଳିଥିବା ବେତାଳ ପରି ..

ଯାହାର କୌଣସି ମୁଣ୍ଡ କି ଗଣ୍ଡି

ମଧ୍ୟ ନଥାଏ 

ସମସ୍ତ ଶରୀର ଏଠି ଅଦୃଶ୍ୟ 

କେବଳ ଉପସ୍ଥିତି ସମସ୍ତ 

ଥିବା ନଥିବା ସ୍ଥାନରେ ଥାଏ ...