ଅନୁମତି ଦିଅ ପିତା

       

ମରତ ପୁରକୁ ବୁଲିଯିବୁ ଆଜ

ଅନୁମତି ଦିଅ ପିତା ,

ଭକତଙ୍କ ସଙ୍ଗେ ଦିନ ବିତାଇବୁ

ସଙ୍ଗତରେ ଯିବେ ମାତା ।

ଶୟନ କାଳରେ ମଥା ଆଉଁସିକି

କହୁଥିଲେ ମାତା କାଲି ,

'ପିତାଙ୍କଠୁ ତୋର ବୁଝିବୁଟି ବାପ

ମରତକୁ ଯିବା ବୁଲି ।

ଯେତେ ଶୈବ,ଶାକ୍ତ, ଗାଣପତ୍ୟ ପୀଠ

ସବୁ ନିରେଖିବା ନେତ୍ରେ ,

ଦୁନିଆବାସୀଙ୍କ ଦୁଃଖ, ସୁଖ ବୁଝି

ଫେରିବା କୈଳାସ କ୍ଷେତ୍ରେ ।

ସେଥିପାଇଁ ମୁହିଁ କରପତ୍ର ଯୋଡ଼ି

ଅନୁମତି ଲୋଡ଼େ ପିତା ,

ତବାଦେଶ ହେଲେ ସଅଳ ଚଳିବୁ 

ବୁଝିବୁ ଭକ୍ତଙ୍କ କଥା ।