ଅଣସରେ ଦାରୁ ଦିଅଁ

ଶହେ ଆଠ ଗରା  ପାଣିରେ ଗାଧୋଇ 

     ଜଗାକୁ ହୋଇଛି ଜ୍ବର

ଅଣସର ଘରେ    ହୋଇ ରୋଗାକ୍ରାନ୍ତ 

      କମ୍ପନ୍ତି ଚାରି ଠାକୁର

    ଯଥା ଦେହେ ତଥା ଦେବେ

ପ୍ରତିପଦ ଠାରୁ     ନେତ୍ରୋତ୍ସବ ଯାଏ 

     ଏକାନ୍ତେ ବିଶ୍ରାମ ନେବେ ।

ହେବ ନାହିଁ ଲାଗି     ନିତ୍ଯ ନୈମିତ୍ତିକ 

      ଅନ୍ନ ଶ୍ରୀମହାପ୍ରସାଦ 

ବାଜିବନି ବାଜା      ଘଣ୍ଟା ଓ କାହାଳୀ

      ପ୍ରବେଶ ତାଟି ନିଷେଧ

      ଭୁଞ୍ଜିବେ ସେ ଦୁଗ୍ଧ ସର

ଲାଗି ହେବ ଭୋଗ    ଫଳ ଛେନା ଗୁଡ

      ସେବିବେ ଦଇତା କୁଳ ।

ପିନ୍ଧି ଶ୍ବେତ ବସ୍ତ୍ର      ଦଇତା ପତିଏ

      କରିବେ ଗୁପତ ସେବା

ଦେବେ ଦଶମୂଳ     ସ୍ବତନ୍ତ୍ର ମୋଦକ

       କବିରାଜ ଗଢିଥିବା

       ବଡ ଓଡିଆ ମଠରେ

ବରଷକ ତଳୁ      ପୋତାଥାଏ ରହି

      ଫୁଲୁରି ତେଲ ଯତ୍ନରେ ।

ମିଶା ଯାଇଥାଏ     ଦେଶୀ ଘିଅ ମହୁ

       ନବାତ ଓ ଖୁଆସର 

ନାନା ଚେରମୂଳି     ଆୟୁର୍ବେଦ ମତେ

      ବିଧିରେ ହୋଇ ସତ୍କାର 

      ରାଶିତେଲ ବେଣାଚେର

ଯୂଇ ଯାଈ ମଲ୍ଲୀ     ମାଳତୀ କେତକୀ

        ଚନ୍ଦନ ଚମ୍ପା ବଉଳ ।

କୃଷ୍ଣ ପଞ୍ଚମୀରୁ     ସପ୍ତମୀ ଆଷାଢେ

       ଫୁଲୁରୀ ତୈଳ ମର୍ଦ୍ଦନ 

ଉପଚାରେ ସୁସ୍ଥ      ଚତୁର୍ଦ୍ଧା ମୂରତି

       ରୋଗ ହୁଏ ଉପଶମ 

       ନେତ୍ରଲାଗି ମହୋତ୍ସବ 

ଅମାବାସ୍ୟା ଦିନ    ଷୋଡଶୋପଚାରେ 

      ପୂଜିତ ହୋଇବେ ଦେବ ।