ଅନାବିଳ ବନ୍ଧୁତ୍ୱ

କୁଆଡେ ହେ ବନ୍ଧୁ ଚାଲିଗଲ ତୁମେ

ଖୋଜ ଖବର ବି ନାହିଁ ?

ଗାଆଁ ବରଗଛ ଅନେଇ ରହିଛି 

ତୁମ ଫେରିବା ବାଟକୁ ଚାହିଁ। 

ପିଲାଦିନେ ଆମେ ଏଇ ଗଛ ମୂଳେ

କରୁଥିଲୁ କେତେ ମଜା 

ସାଙ୍ଗସାଥି ମେଳେ ଦିନଯାକ ଏଠି 

ଖେଳୁ ଥିଲୁ ମନ୍ତ୍ରୀ ରଜା ।

ଗଛରେ ଚଢିବା ଓହଳେ ଝୁଳିବା 

ଗୀତ ଗାଇ ଗାଇ ନାଚିବା

କାହାକୁ ଚିଡେଇ କାହାକୁ କନ୍ଦେଇ 

ମା ଠାରୁ ଗାଳି ଖାଇବା ।

ଗଛ ପାଖେ ଗଲେ ଏଇ ସବୁ କଥା 

ମନେ ପଡୁ ଅଛି ବେଶି

ଆଗ ପରି ଆଉ ଗଛ ବି ଖେଳୁନି 

ସିଏ ବି ଯାଇଛି ରୁଷି। 

ଆଗ ପରି ଗଛ କଥା ହେଉ ନାହିଁ 

ଚୁପ୍ ଚାପ୍ ବେଶି ରହୁଛି 

ନିତି ଦୁଇ ଥର ଗଛ ମୂଳେ ଯାଇ 

ମନ ମାରି ଫେରି ଆସୁଛି ।

ଶେଷ ଥର ପାଇଁ ଆସ ଥରେ ବନ୍ଧୁ 

ଦୁହେଁ ଯାଇ ଭେଟି ଆସିବା 

ତୁମକୁ ଦେଖିକି ଯଦି ବୁଝି ଯାଏ 

ପିଲାଦିନ ଫେରି ପାଇବା 

ଆମ ପିଲାଦିନ ଫେରି ପାଇବା।